«Достық үйінде» облыстық ардагерлер кеңесінің кезекті кеңейтілген алқа мәжілісі өтті. Оған алқа, тұрақты комиссия мүшелері, белсенді ардагерлер мен БАҚ өкілдері қатысты.
Жиынды облыстық ардагерлер кеңесінің төрағасы Серік Дүйсенбаев жүргізіп, бастауыш ұйымдардың жүйелік құрылымдарын жетілдіру, олардың бірлігін арттыру, қоғамдық-саяси шараларға қатысуын қамтамасыз ету жайын қозғады.
Алқада «Ардагерлер ұйымы» республикалық қоғамдық бірлестігінің XI съезінде қабылданған шешімдер мен алдағы міндеттер кеңінен талқыланды. Сондай-ақ қозғалысты дамыту, ұйым қызметінің тиімділігін арттыру және ардагерлердің әлеуметтік-құқықтық мүдделерін қорғау бағытындағы негізгі міндеттер сөз болды.
Күн тәртібіндегі алғашқы мәселе бойынша Байқоңыр қалалық ардагерлер кеңесінің төрағасы Скендір Жарекесов жыл басынан атқарылған жұмыстар мен алдағы міндеттер туралы хабарлама жасады. Баяндамада Байқоңыр қалалық ардагерлер кеңесінің саяси тұрақтылықты сақтау, елдің ауызбіршілігін, тыныштығын қамтамасыз ету, ұлттық құндылықтарды насихаттау, бастауыш ұйымдар рөлін арттырудағы жұмыстары айтылды.
– Байқоңыр қалалық ардагерлер ұйымы жаңа құрылымда былтыр өз жұмысын жүйелі жүргізе бастады. Жыл сайын ұрпақтар сабақтастығын нығайту бағытында жүйелі жұмыс жүргізіп келеді. Әсіресе бастауыш ұйымдар белсенділігі артып, олардың қоғамдық өмірдегі ықпалы күшейіп отыр.
Бастауыш ұйымдар – қоғам мен халықтың арасын байланыстыратын маңызды құрылымдардың бірі. Олар тұрғындармен тікелей жұмыс жасап, халықтың әлеуметтік көңіл-күйін бақылауға, ел ішіндегі татулық пен бірлікті нығайтуға өз үлесін қосуда. Әрбір мекеме мен ұйым жанындағы ардагерлер кеңестері жастармен кездесулер өткізіп, еңбек адамдарының өнегелі жолын насихаттап, ұлттық тәрбиені дәріптеуде. Осыған орай айта кететін бір жайт, Байқоңыр қаласында бастауыш ұйымдар құру түбегейлі қолға алынып, былтыр 6 ұйым болса, қазір олардың саны 12-ге жетіп, тағы 2 мекемеде тіркелуге дайындық жүріп жатыр. Қалалық ардагерлер ұйымына тіркелгендер саны да 124-тен 2620-ға өсті. Әр бастауыш ұйымға тәжірибелі, беделді төраға бекітілді, – дейді ол.
Жиында Серік Дүйсенбаев алдағы 20-21 маусым күндері Арал ауданында өткізілетін облыстық семинар-кеңестің маңызы мен бағдарламасы туралы айтып өтті.
Облыстық кеңес ардагерлерге құрмет көрсетуді, олардың еңбегін насихаттауды және әлеуметтік қолдауды тұрақты назарда ұстап келеді.
Алқа мәжілісінде Медицина қызметкерлері күніне орай сала ардагерлеріне құрмет көрсетілді. Олардың қатарында Раиса Көзденова, Рыскүл Серғазиева, Қанымкүл Шаханова бар. Арал ауданының құрметті азаматы, ардагерлер қозғалысының белсенді өкілі Еділ Талапбаевтың 75 жас мерейтойы да лайықты деңгейде атап өтілді. Ардагерлерге құрмет көрсетіліп, сый-сияпат жасалды. Қоғамдық жұмыстарға белсене қатысып, өңірдің әлеуметтік-экономикалық дамуына елеулі үлес қосқандар «Қызылорда облысының құрметті ардагері» төсбелгісімен марапатталды. Сондай-ақ бірқатар комиссия мүшесіне куәлік тапсырылды.
Ардагерлерге көрсетілген құрмет – олардың қоғам алдындағы еңбегіне деген шынайы алғыс пен сыйластықтың көрінісі. Ұрпақ сабақтастығын нығайтып, үлкенді құрметтеу дәстүрін дәріптеу бағытындағы игі жұмыстар алдағы уақытта да жалғасын таба береді.
Сара АДАЙБАЕВА,
«Сыр бойы»
