Өткен жылдың 12 айында облыс экономикасына 291,6 млрд теңге инвестиция тартылды. Бұл ҚР Премьер-Министрі мен облыс әкімі арасындағы меморандумға сәйкес инвестиция тарту жоспары көрсеткішінен 27%-ке артық.
Оның артығымен орындалуына Қызылорда облысының 2023 жылға дейінгі экономикалық даму жоспары әсер етті. Мұның аясында 2020 жылы құны 7,1 млрд теңге болатын 89 жоба іске қосылды. Соның нәтижесінде 700-ден аса жаңа жұмыс орны құрылды.
Атап көрсетер болсақ, азық-түлік тауарлары өндірісі – 18, азық-түлік емес тауарлар өндірісі бойынша – 8, ауыл шаруашылығында – 47, құрылыс материалдары саласында – 9, халыққа қызмет көрсету саласында 7 жоба жүзеге асырылды.
Облыс орталығында «Консервіленген түрлі өнімдер» жобасы бойынша қой, сиыр және жылқы етінен жасалған консервіленген дайын өнімдер, сонымен қатар, күріш, қарақұмық жармасы және арпа ботқасы өндіріле бастады. Осы жұмыстардың нәтижесінде нарыққа жергілікті тауар өндірушілердің өнімдері қосылуда. Мұны пандемия кезінде ұтымды жетістік деп есептеуге болады.
Индустрияландырудың үшінші бесжылдығы аясында өңірде құны 554 млрд теңгеден асатын және 7 мыңға жуық жұмыс орнын ашуға мүмкіндік беретін 26 жоба жүзеге асырылуда. Оның ішінде екі жоба пайдалануға берілді. Ол – Арал ауданындағы Ақбасты елді мекеніндегі тауарлы балықты терең өңдеу цехтары. Оның бірі 100 тоннаға дейін ауланған балықты сақтаса, екінші цех күніне 40 дана балық консервісін дайындауда. Аталған цех пен басқа да жұмыс істеп тұрған кәсіпорын өнімдері Ресей, Польша, Қытай, Германия, Грузия елдеріне экспортқа шығарылуда.
Сондай-ақ, «Аралтұз» АҚ-ның «3-Испан цехын салу» (жоба құны – 3 млрд теңге) және «Qazaq Camel» ЖШС-ның «Түйе сүтінен құрғақ ұнтақ дайындау цехы» (жоба құны – 1,5 млрд теңге) жобаларының құрылыстары басталды. Олар биыл пайдалануға берілмек. Мұнымен қатар, «Дана Кварц» ЖШС-ның «Арал ауданында кварц құмын тау-кен байыту комбинаты» жобасы толық қуаттылықта іске қосылады деген жоспар бар.
Биыл жалпы сомасы 52 млрд теңгенің 7 жобасын, оның ішінде шыны зауытын іске қосу жоспарланған. Бұл 670 жаңа жұмыс орнын ашуға мүмкіндік береді. Қазірдің өзінде ірі кәсіпорындар айналасында ілеспе өндірістер құру мәселесі қарастырылуда.
Сонымен қатар көктем айларында жалпы құны 93,5 млрд теңгені құрайтын кальцийленген сода өндіретін зауыт құрылысы басталып, 669 адамды жұмыспен қамту күтіліп отыр.
>>> Біздің Facebook, Instagram парақшаларымыз бен Telegram каналымызға жазылыңыз! <<<
