Елімізде пластикалық құбыр шығаратын өндіріс орындарының өнімдеріне сұраныс артуда. Себебі, су, кәріз жүйелерін ауыстыру мен оңтүстік өңірлерді газдандыру ісі қарқынмен жүріп жатыр. Шиелі ауданына сапар барысында біз «Қазақстанның мұнай-газ химиялық компаниясы «Кемикал» ЖШС Қызылорда филиалына арнайылап ат басын бұрған едік.Шиелі кентінің бір шетіне орналасқан кәсіпорынға ертелетіп табан тіредік. Бізді филиал директорының орынбасары Арман Әбдіқадыров қарсы алып, өндірістегі жұмысты көрсетті. Зауыттағы толассыз тірлік көңіл тоғайтады. Заман талабына сай іс атқарып тұрған өндіріс еңбеккерлері өздеріне жүктелген міндетті мінсіз орындауға талпынуда.
«Аталған құбыр зауыты 2009 жылы Алматы қаласында ашылған. «КНК «Кемикал» ЖШС еліміздегі өндірістік мүмкіндігін үздіксіз дамытып келе жатқан бірден-бір жүйе құраушы мекеме десек те болады. Біздің кәсіпорын осы компанияның филиалы саналады. Зауытта, жалпы, су және газ жүйесіне қажетті түрлі құбырлар шағарылады. Беріктігі өте жоғары. Өндірілетін өнім отандық талаптарға толық сай келеді. Яғни, сапалы. Өткен 2018 жылы 1,6 млн қума метр өнім өндірдік», – деді А.Әбдіқадыров кәсіпорын қызметін баяндай жүріп.
Айтуынша, алматылық фирма бұрынғы «Химпродуктресурс» мекемесін 2010 жылы сатып алған. Жұмысшыларын қысқартпай тұрақты жұмыс жасап келеді. Бүгінгі таңда жұмысшылар төрт ауысыммен еңбек етеді.
«Өндірістік процесс соңғы үлгідегі автоматты құрылғылармен жабдықталған. Бәрі сақадай-сай жұмыс атқарып тұр. Пластикалық құбыр сапасы жағынан темірге қарағанда әлдеқайда жоғары және коррозияға әлдеқайда төзімді. Жарамдылық мерзімі ұзаққа барады. Өнімдер кемінде 50 жылға жарамды. Оны тексеріп отыратын арнайы зертханамыз бар. Олар өнімнің сапасы үшін жауап береді», – деп толықтырды ауысым шебері Мұхит Кенеев.
Айта кетейік, жергілікті кәсіпорын су және газбен жабдықтау жүйелерінде қолдануға арналған құбырдан өзге өндірістік бағыттағы құбырлар шығаруға мамандандырылған. Қазір мұнда 5 техникалық желі жұмыс істеп тұр. Жұмыстың басым бөлігі автоматты түрде жүзеге асады. Өндіріске қажетті барлық техника Германиядан әкелінген. Немістің «Крас Маффай» фирмасының қондырғылары. Жергілікті еңбеккерлерді арнайы мамандар келіп оқытқан, кейіннен тәжірибе алмасқан.
– Біздің кәсіпорынға тапсырыстың көп бөлігі жаз мезгілінде келеді. Бүгінгі таңда «КНК» Кемикал» ЖШС – полимер шикізатын сатып алып, оны өңдеумен айналысатын еліміздегі ірі кәсіпорындардың бірі. Біз тұтынушы тапсырысы бойынша жұмыс жасаймыз. Мысалы, қазіргі таңда өндірген өнімдерімізді өзіміздің аймақтан өзге Түркістан, Маңғыстау және Павлодар облыстарына жіберіп жатырмыз. Тапсырыстың ауқымды бөлігі, яғни 70 проценті «Қазатомөнеркәсіп» Ұлттық компаниясына тиесілі. Осы компаниямен ұзақ мерзімді келісім-шартымыз бар, – деді бас директордың орынбасары.
Кәсіпорында өндірілетін полиэтилен құбырларының диаметрі әртүрлі. Мәселен, су және газ тартуға 50-630 мм-ге дейінгі құбырлар пайдаланылады. Ал өндірістік мақсаттағы құбырдың диаметрі 90 мм-ден 195 мм арасы. Мұндай көлемді құбыр уран өндірісі үшін аса қажет болып саналады.
Кәсіпорынның байырғы мамандарының бірі Мұхит Кенеев осы аудандағы Жуантөбе ауылдық округі Алғабас ауылының тұрғыны. «Мұнда «Химпродуктресурс» мекемесі жұмысын бастаған 2003 жылдан бері тұрақты еңбек етіп келемін. 2011 жылы ауысым шебері болып бекідім. Жұмысым өзіме ұнайды. Жалақысы да ойдағыдай»,– дейді ауысым шебері.
Айта кетейік, мұнай қалдығынан жасалатын полиэтилен грануласы елімізде Павлодар қаласында ғана шығарылады. Алайда, ол «КНК Кемикал» кәсіпорындарының технологиясына сәйкес келмейді екен. Сол себепті, өндіріске қажет шикізат Ресей мен Қытайдан, Оңтүстік Кореядан жеткізілсе, арнайы химиялық қоспалар Германиядан әкелінеді. Кәсіпорын қазір жүзден астам жергілікті тұрғынды жұмыспен қамтып отыр.
Дәуіржан ЕЛУБАЕВ.
Шиелі ауданы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
