ХХІ ғасырдың жан-жақты білімді, дарынды ұрпақтарын тәрбиелеуде білім саласының алдындағы міндет аса ауқымды. Талап жоғары, таңдау шексіз. Бұл орайда ұстаздар қауымының ерекше шығармашылық ізденіспен еңбек етуі қажет.
Осы талап тұрғысында облыстық білім басқармасының басшысы Майра Мелдебекова бір сәт өзінің ұстаздық міндетіне оралып, бүгінгі оқушылардың білім деңгейін саралап көрді.
Е.Әуелбеков атындағы дарынды балалар мектеп-интернатының 8-сыныбына “Алгебра” пәнінен сабақ беріп, онда “Статистика. Жиілік алқабы, жиілік гистограммасы” тақырыбы бойынша оқушылардың алған білімдерін байқап көрді. “PISA” халықаралық зерттеуінің мазмұнына сай есептерді шығаруға жаттықтырып, жалпы статистиканың қоғамдағы, өмірдегі маңызын түсіндіріп берді. Нәтижесінде, оқушылар халықаралық зерттеу қорытындысына сай Қазақстанның және Қызылорда облысының әр сала бойынша көрсеткіштерімен танысып, осы мазмұндағы есептерді шығарды.
Айта кетейік, алгебра сабағы “Марафон” электронды оқыту бағдарламасына негізделген және жаңартылған білім беру мазмұнына сәйкес дайындалған, информатика пәнімен кіріктіріліп өткізілді. Оқушылар жеке және топтық формада жұмыс жасап, тапсырмаларды компьютерде орындады. Ұлттық білім беру деректер қорындағы статистикалық мәліметтермен танысты. Сабақ соңында рефлексия жасалып, оқушылар бір-бірінің жұмысын бағалап, ой-пікірлерін ортаға салды. Осыдан кейін компьютер автоматты түрде әрбір оқушының білім деңгейін нақты көрсетіп берді.
Сабақ on-line режимінде жүргізіліп, барлық ауданның 8-сынып оқушылары қатысуға мүмкіндік алды. Дәлірек айтқанда, бұл сабаққа 500-ге жуық оқушы қатысты. Өз кезегінде олар да on-line режимінде кері байланыс арқылы сабақ барысында алған әсерлерін айтып, пікірлерін бөлісті.
Бір сөзбен айтқанда, Майра Тұрғанбайқызының қарапайым ұстаз ретіндегі имиджі шәкірттерге шынайы еңбектің ерекше үлгісін аңғартқандай болды.
Ғазиза ӘБІЛДА.
>>> Біздің Facebook, Instagram парақшаларымыз бен Telegram каналымызға жазылыңыз! <<<
