Жуырда қаладағы «Мұрагер» мектебінде облыстық полиция департаменті және облыстық білім басқармасының бірлесіп ұйымдастыруымен «Білім беру ұйымдарында төтенше жағдайлардың алдын алу» тақырыбында ведомствоаралық бірлескен облыстық семинар-кеңес өткізілді.
Облыстық білім басқармасы басшысының орынбасары Ақзира Бақтыбайқызы бүгінгі таңда қоғамда орын алып отырған қолайсыз оқиғалардың балалар өміріне қауіп төндірмеуі үшін тәрбиелік шаралардың ауқымын кеңейтіп, оларға тұрақты түрде психологиялық тұрғыдан қажетті кеңестер беріп отырудың маңыздылығын айтты.
Облыстық полиция департаменті, Жергілікті полиция қызметі бастығының орынбасары Ерболат Жәукеев кәмелетке толмағандар арасындағы қылмыстың бүгінгі көрсеткіші жөнінде баяндай келіп, алдын алу шараларын күшейтуді ұсынды. Осы ретте облыстық полиция департаменті, экстремизмге қарсы іс-қимыл басқармасының бастығы Қуаныш Оразов талқыланып отырған тақырыпқа сай ой-пікірін білдірді. Сол секілді психолог маман Алмагүл Аяғанова, Шиелі индустриалды-аграрлық колледжі директорының орынбасары Бақтияр Дайрақұлов сынды мамандар ойларын ортаға салды. Семинар-кеңестің келесі бөлімінде қатысушылар Назарбаев зияткерлік мектебінде, «Рухани жаңғыру» орталығында және қаладағы №1 өрт сөндіру бөлімінде болып, қауіпсіздік шараларының барысымен танысты.
>>> Біздің Facebook, Instagram парақшаларымыз бен Telegram каналымызға жазылыңыз! <<<
