Қызылорда қаласында қылмыстық жазасын өтеген және пробация қызметінің есебінде тұрған азаматтар арасында ұлттық спорт түрлерінен жарыс ұйымдастырылды. «Ұлттық спорт – ұлт рухы» тақырыбымен өткен шараның мақсаты – жастар арасында салауатты өмір салтын қалыптастыру, ұлттық спортты дәріптеу, зиянды әдеттер мен есірткі қылмысының алдын алу, сондай-ақ азаматтардың қоғамға қайта бейімделуіне қолдау көрсету.
Спорттық сайыс қылмыстық жазасын өтеген адамдарды әлеуметтік бейімдеу мен оңалту орталығының бастамасымен өтті. Іс-шараны ұйымдастыруға Қызылорда облысы полиция департаментінің есірткі қылмысына қарсы іс-қимыл басқармасы, Қызылорда қаласының прокуратурасы, қалалық пробация қызметі, Қызылорда қаласының дене тәрбиесі, спорт және туризм бөлімі мен қалалық жастар ресурстық орталығы атсалысты.
Жарыстың ашылу салтанатында ұйымдастырушы мекемелердің өкілдері сөз сөйлеп, қатысушыларға сәттілік тіледі. Олар мұндай тағылымды шаралардың азаматтарды салауатты өмір салтына баулуда, ұлттық құндылықтарды ұлықтауда және қоғамға қайта бейімделуіне мүмкіндік жасаудағы маңызын ерекше атап өтті.
Сайысқа қатысушылар гір тасын көтеру, қол күрес және асық ату секілді спорт түрлері бойынша өзара бақ сынады. Әсіресе ұлттық болмысымызбен біте қайнасқан асық ату сайысы көпшіліктің қызығушылығын тудырды.
Тартысты өткен бәсекелерде әрбір қатысушы жеңіске деген жігерін байқатып, намысты қолдан бермеуге тырысты. Жарыс алаңында өзара сыйластық пен достық қалыптасып, спорттың адамдарды ортақ мақсатқа біріктіретін құдіреті айқын сезілді.
Қорытындысында әр спорт түрінен үздік нәтиже көрсеткен жеңімпаздар арнайы дипломмен, медаль және бағалы сыйлықтармен марапатталды. Сондай-ақ жарысқа белсенді қатысып, спорттық шеберлігін танытқан азаматтардың барлығына алғыс хат табысталды.
«СБ» ақпарат
