Әскери қызмет – ер-азаматты биікке жеткізетін аса жауапты сала. Мемлекет тұтастығы мен қауіпсіздігін қамтамасыз ету жолындағы міндетін адал атқарып, аянбай еңбек етіп келе жатқан сарбаздар ерлігі көпке үлгі. Мұнда қызмет ету төзімділіқ пен табандылықты қажет етеді. Қиындығы мен жауапкершілігі мол жолда құрметке бөленіп жүрген жандар жетерлік. 5547 әскери бөлімі кадр қызметінің бастығы, капитан Серік Балмашов Отанға адал қызмет ету әрбір азаматтың борышы деп санайды.
Ол 1989 жылы Қызылорда қаласында дүниеге келген. Отбасындағы тұңғыш перзент. Ата-анасы Қашқынбай Балмашов пен Базаркүл Мамбеталиева бүгінде бейнеттің зейнетін көруде. Әкенің қайсар мінезі ұлдарына дарып, олар әскери саланы таңдады. Інісі Берік те ҚР Ұлттық ұланда келісімшарт бойынша борышын өтеп келеді.
Серік жастайынан білімге құштар, өжет бала болды. Қаладағы №173 мектепті үздік бітіріп, Қызылорда гуманитарлық заң колледжіне оқуға түсіп, «Құқықтану» мамандығын алды. Ізденімпаз жігіт кейін Қорқыт ата атындағы Қызылорда университетін және Халықаралық гуманитарлық-техникалық білім ордасын ойдағыдай бітіріп, білімін шыңдады.
2008 жылы Қарулы күштер қатарына шақырылып, мерзімді әскери қызметшіден бастап, Ұлттық ұлан қатарында түрлі маңызды міндеттер атқарды. Өзіне жүктелген істі жауапкершілікпен тыңғылықты орындап, көзге түсті. Астана қаласындағы 6636 әскери бөліміндегі мерзімді қызметте де жақсы жағынан көрінді. Кейін туған жерге келіп, жұмысын жалғастырды. Қызылорда қалалық ішкі істер бөлімі ақпараттық-техникалық қызмет бөлімшесінің инженері, 5547 әскери бөлімі атқыштар ротасының маман іс-жүргізушісі, саптық бөлімнің аға маманы, іздестіру және барлау тобының бөлініс бастығы болды. Қазір әскери бөлімде кадр қызметін басқарады.
– Біздің қызмет қаншалықты жауапты екені баршамызға белгілі. Өйткені ел қорғаны ержүрек сарбаздарды даярлау – салмақты жүк. Сондай-ақ тәртіп пен қауіпсіздікті сақтау, қоғамдық тәртіпті қамтамасыз ету жолында аянбай еңбек етіп келеміз, – дейді С.Балмашов.
Ол – әскери құжат айналымының қырағы бақылаушысы. Бұйрықтардың заңдылығы, хаттамалардың сауаттылығы, құжаттардың ресмилігі мен нақтылығы – күнделікті ісі. Өз жұмысын ұқыпты атқаратын оны әріптестері де құрмет тұтады.
Білікті маманның бағындырған белесі мен ерен еңбегі мерейін үстем етіп, марапат төрінен көрінді. Атап айтар болсақ, «ҚР Қарулы күштеріндегі мінсіз қызметі үшін» ІІІ дәрежелі медалін, «Қазақстан полициясына 30 жыл» мерекелік медалін және «Ұлттық ұлан қызметінің үздігі» төсбелгісін иемденді.
Серік – қызметте мықты маман, үйде отбасының тірегі. Жары Мәншүк Жасұланқызы екеуі 3 қыз тәрбиелеп отыр. Ісі адал, сөзі нық Серікті кейінгі буын әріптестері де үлгі етеді.
Сара АДАЙБАЕВА,
«Сыр бойы»
