Жалағаш ауданындағы әл Фараби атындағы №201 мектеп-лицейінде шәкірттерге уақыт талабына сай жан-жақты білім беру ісі жолға қойылған. Оның басты көрінісі, мектеп-лицей заманауи кабинеттермен қамтамасыз етіліп, қазіргі сандық-техникалық құралдарды пайдалану арқылы әрбір пәнді терең үйретуге сай жабдықталған. Нәтижесінде, жас өрендер ЖИ-ді меңгеріп, өз мүмкіндіктеріне сәйкес жаңалықтар ашып, жетістіктерімен танылып жүр.
Иә, отыз жылдан астам тарихы бар мектеп-лицейде 154 мұғалім 1025 оқушыға білім беріп, жас ұрпақ тәрбиелеуде жемісті еңбек етіп келеді. Білім ошағында оқушылардың шығармашылық әлеуетін, математикалық дайындық деңгейін дамыту мақсатында ашылған IT математика жобасы жүйелі жұмыс жүргізеді.
Мектеп-лицей жыл сайын «Білім бәйтерегі», «Табысты мектеп», «Білімнің биік тұғыры», «Үздік инновациялық мектеп» сынды бірнеше жүлделі аталымдарды иеленіп келеді. Мысалы, 2023-2024 оқу жылында жалпы білім беретін пәндер бойынша облыстық, республикалық олимпиадаға 12 оқушы қатысып, оның 8-і жеңімпаз атанып, ІІ, ІІІ орындарды иеленді. Сондай-ақ бірінші рет өткізілген ауыл мектептеріне арналған пәндік олимпиадада 32 оқушы облыстық кезеңнен жүлделі орындарды жеңіп алды. Ал республикалық кезеңге жолдама алған 4 оқушының 2-еуі І орын, 1-еуі ІІ орын, бір оқушы Алғыс хат алды. Ғылыми жобалар шығармашылық сайысы бойынша 10 оқушы облыстық кезеңде жүлделі орындардан көрінсе, оларды дайындаған ұстаздардың бірі Раушан Атаулиева «Үздік сынып жетекші-2024» республикалық байқауына қатысып, ІІ орын иегері атанды.
Ұстаздардың үздіксіз ізденісі, табанды еңбегі мен оқушылардың жоғары жетістіктерінің нәтижесінде мектеп-лицей 2023-2024 оқу жылының қорытындысымен «Орта білім беретін үздік ұйым» облыстық конкурсының жеңімпазы атанып, 34 млн теңгенің сертификатын иеленді.
Бұдан бөлек, білім ошағы 2023-2024 оқу жылында ауыл мектептері оқушыларына арналған жалпы білім беретін пәндер бойынша республикалық олимпиадада көрсеткен жоғары нәтижелері үшін «Ең үздік ауыл мектебі – 2024» атағын иеленген болатын. Ал 2024-2025 оқу жылы осы олимпиаданың республикалық кезеңіне 8 оқушы қатысып, барлығы да жеңіс тұғырынан табылды. Мектеп-лицей ұжымы республика деңгейінде «Ең үздік ауыл мектебі» аталымын екінші мәрте жеңіп алды.
Өткен оқу жылында «Зерде» республикалық зерттеу жобалары конкурсының аудандық кезеңінде 31 оқушы жүлделі орынға ие болса, облыс көлемінде 6 оқушы жүлдегер атанып, республикалық кезеңге 2 оқушы жолдама алған болатын. Сондай-ақ жалпы білім беретін пәндер бойынша республикалық ғылыми жобалар байқауының аудандық кезеңінде 6 оқушы, облыс көлемінде 2 оқушы жүлдегер атанып, марапат иеленді.
Жоғарыда айтып өткеніміздей, мектеп-лицейге «Қазақстан халқына» қоры арқылы 250 млн теңге бөлініп, бірнеше пәндік кабинет заманауи қажетті құрылғылармен және сабақ барысында пайдаланылатын дидактикалық материалдармен жабдықталған. Сонымен қатар, мұғалімдер де шығармашылығын дамытып, кәсіби біліктілігін арттыруға мүмкіндік алған.
Білім беру ұйымының тағы бір жетістігі, 2025 жылдың қаңтар айынан бастап мектеп шеберханасында тігінші және аспаз кәсібі тереңдетіп оқытылады. Дәлірек айтсақ, мұнда білім алып жатқан жасөспірімдер мектеп бітірген уақытында аттестатпен бірге кәсібіне сәйкес сертификат иеленеді.
– Биылғы 2025-2026 оқу жылында аудандық түрлі байқауларға, олимпиада, ғылыми жобаларға 97 оқушы, облысқа 58 оқушы, республикалық кезеңге 6 оқушы қатысып, І, ІІ, ІІІ орындарды иеленді. Әрине, бұл жетістіктердің артында ұстаздар еңбегі тұрғаны белгілі. Осы орайда мектеп мұғалімдері де кәсіби байқаулардан аудан, облыс, республика көлемінде жоғары марапат төрінен көрінгенін атап өткеніміз жөн. Атап айтсақ «Үздік авторлық бағдарлама-2025» байқауында Роза Абдрахманова, «Дарынды балаға талантты ұстаз» олимпиадасында Бақдаулет Әбдіғали, «Oi-Sandyq» оқу және математикалық сауаттылықтан қазақ тілі мен математика пәндері мұғалімдеріне арналған зияткерлік байқауында Махмуд Ермак сынды мұғалімдер жүлделі орындар иеленді, – дейді мектеп-лицей директоры Айнұр Айбосынова.
Мемлекет басшысы кезекті Жолдауында ауыл мектептеріндегі оқушыларға қала мектептерімен бір деңгейде білім беруді қалыптастыру қажеттігін айтқан еді. Бұл тұрғыда Жалағаш кентіндегі әл Фараби атындағы №201 мектеп-лицейінде жүйелі жұмыстар қолға алынғанына көз жеткізе отырып, жемісті қадамы жалғасатынына сенімдіміз.
Ғазиза ӘБІЛДА,
«Сыр бойы»
