Қызылорда өңірінде табиғаттың көзге көрінбейтін тылсым сырын айшықтайтын фотосуретшілер аз емес. Солардың алдыңғы қатарында тұрған кәсіби фотограф, макрофотография жанрының шебері Андрей Тайгунов биыл ердің жасы 50-ге толып, шығармашылығы кемелдене түсті.
Оның басты ерекшелігі – көпшілік байқамайтын ұсақ дүниеден үлкен мағына таба білуінде. Қарапайым, көзге елеусіз жәндіктер мен өрмекшілер, дала гүлдері мен шөптер, таңғы шық пен күн батқандағы көрініс оның объективінде ерекше ғажайыпқа айналады.
Бүгінде фотографтың еңбектері әлеуметтік желілерде кеңінен танымал. Әсіресе, макротүсірілім бағытындағы парақшасында мың жарымнан астам оқырманы бар. Оның әрбір суреті көрерменді бей-жай қалдырмай, табиғаттың тылсым тынысын сезіндіреді.
Фотограф тек жәндіктер әлемімен шектелмейді, кең даланы, асқар тауларды, жан-жануарларды, күннің батуы мен шығуын ерекше шеберлікпен бейнелейді. Әр сапары – жаңа әсер, жаңа шабыт. Өзімен тіл табысқан жанға табиғат та бар сырын ашатын сияқты. Андрейдің әрбір туындысынан жылулық пен жанашырлық анық сезіледі.
Фотосуретке деген қызығушылығы бала кезден басталған. Алғашқы суреттерін 4-сыныпта түсірген. Сол кезеңде ақ-қара түсті кеңестік фотоаппараттарды қолданған. Фотографияға баулыған жандар, яғни ағасы Юрий өз ісінің шебері, атасы Иван Ким де фотограф болып еңбек еткен.
Андрей – отыз жылдан астам тәжірибесі бар кәсіби фотограф. Ал макрофотографияға бет бұрғанына көп уақыт болмаса да, өзіндік қолтаңбасын қалыптастырып үлгерді.
‒ Шын мәнінде, ұсақ жәндіктер әлемі біз ойлағандай емес. Макрообъектив арқылы мүлде басқа қырынан ашылады. Сондықтан мұндай суреттер көрерменге ерекше әсер етеді. Бұл салада тек сәтті ұстап қалу жеткіліксіз, әр кадрдың артында үлкен еңбек жатады, ‒ дейді фотограф.
Жаңа белеске жеткен Андрей Тайгунов ізденіс үстінде. Оның шығармашылығы табиғатты тануға, оны қадірлеуге үндейді.
Бағлан АМАНЖОЛ,
«Сыр бойы»
