Қызылордада Кеңес Одағының батыры Тәйімбет Көмекбаевты еске алуға арналған грек-рим күресінен ересектер арасындағы халықаралық турнир өтті. Жарыстың ашылу салтанатында облыс әкімінің орынбасары Мейрамбек Шермағанбет, ҚР Туризм және спорт министрлігі Спорт және денешынықтыру істері комитетінің төрағасы Руслан Есеналин, ҚР грек-рим, еркін және әйелдер күресі федерациясының бірінші вице-президенті Дархан Сәрсенов, Тәйімбет Көмекбаевтың баласы, генерал-майор Бағбан Тәйімбетұлы, батыр ұрпағы Ардашер Шайымбетов қатысты.
Дүбірлі дода биыл екінші мәрте ұйымдастырылып отыр. Оған Олимпиада, Әлем, Еуропа, Азия ойындарының жеңімпаздары мен жүлдегерлері келді. Бозкілем үстіндегі белдесуде 20-дан астам елдің балуандары жүлделерді сарапқа салды. Олардың қатарында Әзербайжан, Бразилия, Қырғызстан, Қытай, Моңғолия, Өзбекстан, Пәкістан, Ресей, Татарстан, Тәжікстан, Түркия, Түркіменстан, Үндістаннан және еліміздің барлық аймағынан 200-ге жуық спортшы 10 салмақ дәрежесінде бақ сынады.
– Кеңес Одағының батыры Тәйімбет Көмекбаевты еске алуға арналған грек-рим күресінен ересектер арасындағы халықаралық турнир алдымен 1995 жылы самбодан республикалық ашық турнир ретінде ауданнан бастау алған еді. Содан бері осы жарыстан 100-ге жуық Әлем және Азия чемпиондары шыңдалып шықты. Өткен жылға дейін ол Қармақшы ауданында республикалық деңгейде ұйымдастырылды. Былтырдан бері облыс әкімі Нұрлыбек Нәлібаевтың тікелей қолдауымен халықаралық деңгейде облыс орталығында өтуде. Сыр өлкесінде есімі елге, әлемге әйгілі тұлғалар аз емес. Олардың қатарында Кеңес Одағының батыры Тәйімбет Көмекбаев есімін ерекше құрметпен айтамыз. Қаһарман жауынгер қан майданда от кешіп, Отан үшін кеудесін оққа тосқан, ерлігімен көзге түсіп, жаужүректігімен батыр атанған тұлға, – деді облыс әкімінің орынбасары.
Салтанатты шара барысында Руслан Есеналин Бағбан Тәйімбетұлы «Денешынықтыру және спортты дамытуға сіңірген еңбегі үшін» төсбелгісімен марапатталды.
Айта кету керек, өңірде олимпиадалық спорт түрлері, оның ішінде грек-рим күресі қарқынды дамып келеді. Бүгінде осы спорт түрімен шұғылданушылар саны 1600-ден асты. Спорт саласына көрсетілген қолдаудың арқасында өткен жылы грек-рим күресінен Әлем чемпионы атанған сырбойылық балуан Айдос Сұлтанғали ел мерейін үстем етіп, тарихи жеңіске қол жеткізді.
Халықаралық турнир алдында өткен баспасөз мәслихатында облыстық денешынықтыру, спорт және туризм басқармасының басшысы Бақтияр Артаев өз сөзінде турнирдің өңір спорты үшін маңызы зор екенін атап өтті.
– Беделді бәсеке отыз жылдан астам уақыттан бері алдымен самбо, кейіннен грек-рим күресінен тұрақты түрде өткізіліп келеді. Онда шеберлігін шыңдаған балуандар арасынан кейіннен әлемдік деңгейде топ жарған саңлақтар шықты. Сондықтан бұл турнирді жарқын жеңістерге жолашар жарыс ретінде бағалаймыз. Алдағы уақытта облыста мұндай көптеген бәсеке өтеді деген жоспарымыз бар, – деді басқарма басшысы.
Ал ҚР грек-рим, еркін және әйелдер күресі федерациясының вице-президенті Дәурен Жабасов турнирдің халықаралық деңгейіне ерекше тоқталды.
– Қызылорда төрінде өтетін бұл дода әлемдік күнтізбедегі маңызды жарыстардың біріне айналды. Олимпиада, әлем және құрлықтық жарыстардың жеңімпаздары мен жүлдегерлерінің қатысуы турнирдің беделін айқындайды, – деді ол.
Сыр өңірінде Кеңес Одағының батыры Тәйімбет Көмекбаевты еске алуға арналған грек-рим күресінен ересектер арасындағы ІІ-халықаралық турнир бүгін өз мәресіне жетті. Екі күнге созылған дүбірлі додада 20-дан аса елдің білекті балуандары 10 салмақ дәрежесінде бақ сынады.
Халықаралық турнирде өзбекстандық Ихтиор Батиров (55 келі), Феруз Тухтаев (60 келі), Абдулло Алиев (77 келі), Худоёрджан Шамшаддинов (97 келі), Жетісу облысынан Диас Қалтай (82 келі), Жеңіс Ерасыл (87 келі), шымкенттік Әділхан Сатаев (72 келі), қызылордалық Нұрбол Бақдәулет (65 келі), қарағандылық Алмат Кебісбаев (67 келі), жамбылдық Ерғали Әлішер (130 келі) сынды спортшылар жеңіс тұғырынан көрінді.
Әділжан ҮМБЕТ,
«Сыр бойы»
