Өңірлік коммуникациялар қызметінің ақпарат алаңында өткен баспасөз конференциясында аймақтағы спорт саласында атқарылып жатқан жұмыстар сараланып, көпшілік көкейіндегі бірқатар сауалға нақты жауап берілді. Сонымен қатар, «Қайсар» футбол клубының қазіргі жағдайы мен алдағы даму жоспары кеңінен таныстырылды.
Жиын барысында соңғы уақытта әлеуметтік желілерде қызу талқыланған мәселенің бірі «Қайсар» клубын қаржыландыру тақырыбы да назардан тыс қалмады. Кейбір желі қолданушылары клубқа бөлінетін қаржыны қысқартып, оны мұғалімдер мен жұмысшылардың жалақысын арттыруға бағыттау жөнінде пікір білдірген болатын. Осыған байланысты жауапты сала басшылары нақты түсіндірме берді.
Олардың айтуынша, бүгінгі таңда Қызылорда облысында мемлекеттік және жеке кәсіпорындар бойынша жалақы қарызына қатысты ірі мәселе тіркелмеген. Яғни, еңбекақы төлеу мәселесі тұрақты бақылауда және бұл бағытта жүйелі жұмыс бар. Сондықтан спорт саласына бөлінген қаржы әлеуметтік міндеттемелерге кері әсер етпейді.
Облысы әкімінің орынбасары Мейрамбек Шермағанбеттің айтуынша, кейінгі төрт жылда 24 заманауи спорт кешені пайдалануға беріліп, халықтың салауатты өмір салтын ұстануына кең мүмкіндік жасалған.
– Бүгінде Қызылорда қаласының сол жағалауында ірі спорт нысандары бой көтерді. Атап айтқанда, «Самұрық-Қазына» ұлттық әл-ауқат қорымен бірлесіп салынған теннис орталығы, 11 мың орындық халықаралық стандарттарға сай «Қайсар Арена» стадионы және ерекше қажеттілігі бар жандарға арналған инклюзивті спорт орталығы ел игілігіне берілді. Сонымен қатар, құны 20,5 млрд теңгені құрайтын көпбейінді «Қызылорда Арена» кешенін биыл пайдалануға беру жоспарланып отыр. Бұл нысандардың барлығы өңір тұрғындарының игілігі үшін жасалып жатқан нақты қадам. Спорт инфрақұрылымын дамыту арқылы біз бұқаралық спортты дамытып қана қоймай, халықаралық деңгейдегі жарыстар өткізуге де мүмкіндік алып отырмыз, – деді Мейрамбек Зинабдинұлы.
Баспасөз конференциясында көпшілік назарындағы «Қайсар» футбол клубының жағдайы да кеңінен сөз болды. Жарты ғасырдан астам тарихы бар клубтың өткені мен бүгіні сараланып, алдағы даму бағыты таныстырылды. 1968 жылы «Волна» атауымен құрылған команда бүгінде өңірдің спорттық брендіне айналған.
Клубтың қаржыландыру мәселесіне тоқталған спикерлер соңғы жылдары бюджет қаражатының тиімді әрі кезең-кезеңімен азайтылып жатқанын жеткізді. Бұрынғы жылдары миллиардтаған қаржы бөлінсе, биыл бұл көрсеткіш айтарлықтай қысқарып, 200 млн теңгеге дейін төмендеген. Сонымен қатар, клубтың бұрыннан қалған берешегі де кезең-кезеңімен жабылып келеді.
Мемлекет басшысының тапсырмасына сәйкес, «Қайсар» футбол клубы 2025 жылдың соңында жекешелендіріліп, жеке басқаруға берілген. Қазір клубтың жаңа иесі «TAU Group LTD» компаниясының басшысы, жергілікті кәсіпкер Исламғали Қозбақов.
Клуб иесі бұл жауапкершілікті үлкен сенім ретінде қабылдайтынын атап өтті.
– «Қайсар» тек клуб емес, бұл халықтың сенімі. Біздің басты мақсатымыз – команданың ойын нәтижесін жақсарту, жанкүйерлер үмітін ақтау және болашаққа мықты негіз қалыптастыру. Сол үшін біз академия құрылысына басымдық беріп отырмыз. Негізгі үш бағытымыз бар: стадионды өзін-өзі қамтамасыз ететін деңгейге жеткізу, жанкүйер сенімін нығайту және мықты футбол мектебін қалыптастыру. Осы бағытта нақты жұмыстар басталып кетті, – деді Исламғали Қозбақов.
Оның айтуынша, қазіргі таңда 18 млрд теңгеге заманауи футбол академиясының құрылысы жүргізілуде. Жоба аясында бірнеше толық өлшемді футбол алаңы, жабық манеж және медициналық оңалту орталығы салынбақ. Биыл алғашқы үш алаң мен жаттығу базасын пайдалануға беру жоспарланған.
Айта кетейік, жаңа «Қайсар Арена» стадионы УЕФА талаптарына сай IV санатты нысан ретінде танылған. Бұл – өңір спорты үшін маңызды жетістік. Сонымен қатар, стадионды күтіп-ұстау шығындары да жеке инвестор есебінен жабылып отыр.
Жалпы, Сыр өңірінде спорт саласын дамыту жүйелі түрде жүзеге асып келеді. Инфрақұрылымның жаңаруы, жекеменшік инвестициялардың тартылуы және басқару тетіктерінің жетілдірілуі «Қайсардың» ғана емес, тұтас өңір спортының жаңа кезеңге қадам басқанын көрсетеді.
«СБ» ақпарат
