Шиелі ауданындағы «Руханият орталығында» Ұлттық кітап күні мен кітапханашылар мерекесіне орай «Рухани әлем» атты ашық аспан астындағы мерекелік іс-шара өтті.
Салтанатты жиынға арнайы қатысқан аудан әкімінің орынбасары Болатбек Ысмағұлов, «Amanat» партиясы аудандық филиалының атқарушы хатшысы Жібек Баймұратова кітапханашылар қауымын және барша қатысушыларды мерекемен құттықтап, кітап оқудың тек адам үшін емес, қоғам үшін де маңызды екенін атап өтті. Мерекеге орай аудан көлемінде еңбегімен елдің ықыласына бөленіп жүрген кітапханашыларға, сондай-ақ белсенді оқырмандарға, сала жұмысына атсалысып жүрген демеушілерге аудан әкімдігі және «Amanat» партиясы аудандық филиалы атынан құрмет көрсетіліп, марапаттар табысталды.
Осынау мерейлі сәтте аудан әкімдігінің қолдауымен ақын, қазақ әдебиетінің көрнекті өкілі, Халықаралық «Алаш» әдеби сыйлығының, «Құрмет» орденінің иегері, Шиелі ауданының құрметті азаматы Қатира Жәленованың 75 жас мерейтойына орай ақынмен сыр-сұхбат өткізіліп, келелі жиынға ұласты. Мерейтой иесіне аудан әкімінің алғысы табысталып, сый-құрмет көрсетілді.
Аудандық ардагерлер кеңесінің төрағасы Өркен Исмайыл, қаламгер Нұрмахан Елтай, ардагер Жақсылық Әлиев бастаған ақынның ауылдастары, бірге өскен дос-жарандары ыстық ықыласын білдірді. Оқырмандар ақын өлеңдерін жатқа оқыса, Мәдениет саласының үздігі Ақмарал Ноғайбаева, тағы басқа әншілер автордың сөзіне жазылған әндерді орындап, көрермен қауымның зор қошеметіне бөленді.
Кеш барысында ақын Қатира Сыздыққызы туған жеріне тағзым ете тұрып, терең тебіренісін жүрегінен шыққан жыр жолдарымен жеткізді.
Аудандық мәдениет бөлімінің басшысы Аруна Өркенқызының айтуынша, бұл кештің басты мақсаты – кітаптың құндылығын дәріптеу арқылы оқырман мәдениетін қалыптастыра отырып, рухани мұраға деген құрметті арттыру. Осы орайда кітапхана саласындағы кейінгі жаңалықтар насихатталып, сандық технологияны қолдану арқылы кітап оқуға деген қызығушылықтың арта түскені айтылды.
Мерекелік іс-шара барысында «Руханият орталығында» атқарылып отырған жұмыстар кеңінен таныстырылып, музей, архив және АХАТ салаларымен бірлескен мәдени-танымдық жобалардың маңызы аталып өтті.
Гүлдана ЖАҚЫПОВА,
аудандық орталықтандырылған кітапхана жүйесінің директоры
