Отан қорғаушылар күніне орай Қазақстан Республикасы Ұлттық ұланы 5547 әскери бөлімінің жеке атқыштар ротасында сарбаздар арасында дәстүрлі «Мен Отанымның қорғаны» атты патриоттық сайыс ұйымдастырылды.
Шараның басты мақсаты – жас сарбаздардың бойындағы отансүйгіштік қасиетті нығайту, әскери қызметке деген жауапкершілікті арттыру, олардың физикалық дайындығы мен жауынгерлік рухын шыңдау. Сонымен қатар, сайыс қатысушылар арасында достық қарым-қатынасты қалыптастырып, ұжымдық бірлікті күшейтуге бағытталды.
Сарбаздар бірнеше кезеңнен тұратын эстафеталық спорт түрлері бойынша өзара бақ сынады. Онда жылдамдық пен төзімділікті талап ететін жүгіру, күш сынасу элементтері және командалық үйлесімділікті қажет ететін тапсырмалар қамтылды. Әр кезеңде қатысушылар ептілігін, шапшаңдығын және ұйымшылдығын дәлелдеді.
Дәстүрлі дода жоғары деңгейде өтті. Командалар әр сайыста мықтылығын, әскери дайындықтарының жақсы деңгейде екенін айқын көрсетті.
Сайыс қорытындысы бойынша үздік нәтижеге жеткен сарбаздар арнайы дипломдармен және Алғыс хаттармен марапатталып, қаржылай сыйлыққа ие болды.
Мұндай мазмұнды шаралар жас сарбаздардың рухын көтеріп қана қоймай, олардың Отан алдындағы борышын адал атқаруына, ел қауіпсіздігін қорғауға деген сенімін нығайта түседі.
«СБ» ақпарат
