Өмірде тұлғасы аласармайтын, орнын ешкіммен ауыстыруға келмейтін адамдар жетерлік. Соның ішінде кемеңгерлігімен ерекшеленетін, шоқтығы биік тұлға – ұстаз. Өзгенің уақытын аялап, өзінің уақытын аямайтын мұғалімдік қызметке ең биік баға беріліп келеді. Бүгін осы қызметті абыройлы атқарып, өмірден ерте озса да, артына өшпестей із қалдырған ұстаздың бірі Манат Шамбекқызы жайлы сөз қозғамақпыз.
Саналы ғұмырын білім беру ісіне арнаған Манат Сматова 1956 жылы Қармақшы ауданының Жосалы қыстағында дүниеге келген. Сонда Ш.Уәлиханов атындағы №26 қазақ орта мектебінен білім алып, 1981 жылы Шымкент педагогикалық институтын тарих пәні мұғалімі мамандығы бойынша тәмамдайды. 1985 жылдан бастап Қызылордадағы №4 С.Сейфуллин атындағы орта мектепте үздіксіз еңбек етіп, 1993-1999 жылдар аралығында мектеп директорының оқу-тәрбие істері жөніндегі орынбасары, мектеп психологы қызметтерін атқарған. 1999 жылдан бері өз мамандығы бойынша шәкірт тәрбиелеп, өмірінің соңына дейін ұстаздық етті. Сол жерде өзінің адами қасиетін, үлкен парасат иесі екенін танытты. Шәкірт тәрбиелеп, ұстаз деген үлкен құрметке ие болды.
Манат апайдың шынайылығы мен турашылдығын шәкірттері әлі күнге дейін айтып жүреді. Бұл қасиеттерді шәкірттерінің бойына да сіңіре білді.
– Апай өте білікті, білімді болды. Өте қатал, бірақ артында зілі жоқ. Балалардың жақсы оқығанын, шынайы болғанын қалайтын. Үнемі «қолыңмен істегенді мойныңмен көтер» деп адалдыққа, ешкімнің ала жібін аттамауға баулитын. Осындай жақсы тәрбиенің арқасы болар, ол кісінің алдынан өткен шәкірттерінің осалы жоқ. Әріптестерінің барлығы сыйлап, құрмет көрсететін, – дейді шәкірті Айкүміс Қосанова.
Өн бойынан тек ізгіліктің нұры шашылып тұратын ұлағатты ұстаз шәкірттерінің зерделі де зерек болуы жолында барынша аянбай еңбек етті. Үнемі тынымсыз ізденісте болып, түрлі жобаларға қатысты. Ұстаздан дәріс алған оқушылардың барлығы дерлік қандай бәйге болса да, жеңіс төрінен көрінді. Осылайша, қырық жылға жуық еңбек өтілінде елімізге білікті де білімді мамандар даярлауға өлшеусіз үлес қосты. Бұл еңбегі ескерусіз қалған емес.
Манат Сматова – «Бейбітшілік әлемі» халықаралық шығармашылық бірлестігінің, «Ыбырай Алтынсарин», «Астана – 10 жыл» медальдарының, «Қазақстан ұстазы» төсбелгісінің, облыс әкімінің арнайы сыйақысының иегері. Сондай-ақ, өзі ұстаздық еткен мектептің 50 жылдық тарихына арналған «Самғатқан сан қыранды алтын ұя» атты кітаптың, «Тарих – ғасырлар куәсі», «Қазақстан тарихы пәні бойынша тапсырмалар топтамасы, 9-сынып» әдістемелік құралдарының авторы.
Бар ғұмырын ұрпақ тәрбиелеуге, тынымсыз еңбек етуге арнаған жанның аты ешқашан ұмытылмақ емес. Әсіресе, еңбек еткен әріптестерінің, бойына ілім-білім мен ізгілік нәрін құйған шәкірттерінің жадында мәңгі сақталары хақ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
