Мемлекет басшысы Қасым-Жомарт Тоқаевтың «Тәуелсіздік бәрінен қымбат» мақаласы көптің көкейіндегісін дөп басып, қоғамда қызу талқыға түсті. Бұл орайда ел дегенде елгезектік танытып, жұрт дегенде жұмыла қызмет атқарған аға буынның айтары көп.
Аймақтың бірқатар ардагері «Достық үйінде» өткен жиынға қатысып, тәуелсіздіктің құндылығы, қоғамдағы қазіргі мәселелер туралы ойларын ортаға салды. Жиынға облыс әкімінің орынбасары Серік Ахмет қатысты.
Шараны жүргізген облыстық ардагерлер кеңесінің төрағасы Серік Дүйсенбаев қатысушы әрбір азамат тарихи сәттің қалай жүзеге асырылғанын, алғашқы сәттегі қиындықтарды жақсы білетінін жеткізді. Сондай-ақ, Тұңғыш Президент – Елбасы Нұрсұлтан Назарбаевтың бастамасымен саяси тұрақты, экономикасы орнықты мемлекет қалыптасқанын баса айтты.
Қоғам қайраткері Нәжмадин Мұсабаев тәуелсіздіктің алғашқы жылдарында Жаңақорған ауданында атқарылған ауқымды істер, Арал теңізіне «Көкарал» бөгеті салынып, «САРАТС-1» атты ғаламат жобаның жүзеге асқанын, Елбасының Арал ауданына сапары, төл теңгенің айналымға түсуі кезінде жасалған жұмыстар туралы кеңінен сөз қозғады. Теңізді ауданда іске асқан жобалар, әлеуметтік нысандардың бой көтеруі, халық тұрмысының жақсаруы тәуелсіздіктің жеңісі екеніне тоқталды.
Мұнан кейін философия ғылымдарының докторы, Қорқыт ата атындағы Қызылорда университетінің профессоры Баймырза Қожамберлиев бұл стратегиялық бағдарламалық мақала екенін, әр сөзінде үлкен ой, міндеттер барын айтып, әділетті қоғам, адами капиталды қалыптастыру, тіл, жер, экология мәселесі туралы ойын жеткізді. Ал, еңбек ардагері, «Темірбек Қараұлы Жүргенов» қоғамдық қорының төрағасы Сәпен Аңсатов қоғамды толғандыратын жайлар, өңірдің өзекті мәселелері туралы сөз қозғады.
Тәуелсіздіктің арқасында көптеген жетістіктерге қол жеткенін, бірақ әлі де түйіні тарқамаған мәселелер бары да айтылды.
Белгілі ғалым, профессор Қазыбай Құдайбергенов ғылым саласына қолдау қажеттігін, тіл мәселесінде нәтиженің аздығы, өндірістің деңгейі мақтанатындай еместігін атап өтті.
Жиында Серік Ахмет ел тарихы, Сыр өңірі туралы кеңінен сөз қозғады.
– Ғалымдардың айтуынша, әлемде орташа есеппен алғанда 3000 халық бар. Сол халықтың 200-і ғана мемлекет құрды. Олардың 193-і БҰҰ-ның құрамында. Оның ішінде біз де бармыз. «Тәуелсіздік бәрінен қымбат» деген сөз осы жылдың ғана ұраны емес, ол – мәңгілік ұранымыз. Одан қымбат ештеңе жоқ. «Біз ұлы даланың мұрагерлеріміз» деп ауыз толтырып айтамыз. Қазақ халқының тарихы 1465 жылы құрылған Қазақ хандығынан басталмайды. Еліміздің тарихы тереңде, – деді Серік Әбжәліұлы.
Айта кету керек, шараға аудандық ардагерлер кеңесінің өкілдері онлайн қатысты.
>>> Біздің Facebook, Instagram парақшаларымыз бен Telegram каналымызға жазылыңыз! <<<
