Нұр-Сұлтан қаласындағы №51 мектеп-гимназияға түркі әлемінің тарихи тұлғасы Мұстафа Шоқай есімі берілген еді.
Осы мектеп-гимназияда ұлт қайраткерінің тәуелсіздік жолындағы ерлікке толы өмір өнегесі мен мұраларын насихаттайтын музей ашылды.
Салтанатты шараға қоғам қайраткері, саяси ғылымдарының докторы, профессор Әбдіжәлел Бәкір, депутаттар Нұртөре Жүсіп, Жұлдыз Сүлейменова, Қазыбек Иса, Нұр-Сұлтан қаласы тілдерді дамыту басқармасының басшысы Сәкен Есіркеп, шоқайтанушы ғалымдар қатысты.
Білім ордасының басшысы Данара Жомартова музейдің мақсатын сөз етіп, оның ұрпақ тәрбиесінде атқаратын роліне тоқталды. Маңызды іс-шараға келген қонақтарға алғыс білдірді.
Қонақтар тарихи тұлғаның тәуелсіздік жолындағы жанкешті еңбегін атап өтіп, рухани құндылықтар хақында сөз айтты.
Мұражайда ұлт күрескерінің саяси көзқарастарының қалыптасуына əсер еткен тарихи оқиғалар мен М.Шоқайдың эмиграцияда жүрген кезеңдеріндегі атқарған қоғамдық қызметі туралы деректер берілген. Алаш арысының өмірі, саяси жолы, Түркістан, Кавказ, Түркия, Франция елдеріндегі эмигранттық тағдыры, айдауға түскен кезде көрген ауыртпалықтары айқын көрініс тапқан тарихи туындыларынан үзінділер көрсетілген.
Музей экспозициясына М.Шоқайдың өмірімен байланысты бірнеше бағытты қамтитын материалдар мен экспонаттар қойылған.
Салтанатты іс-шара «Ұлты үшін туған ұлы тұлға Мұстафа» атты танымдық кешпен жалғасын тапты. Онда тұлғаның жары Мария Горинаның монологі, қайраткерге арналған жыр шумақтары көрермендер назарына ұсынылды. Сонымен бірге белгілі меценат Фазылбек Мустанов білім ордасының дарынды әрі талантты оқушыларына Мұстафа Шоқай атындағы стипендия мен футбол клубының құрамында тегін жаттығу үшін арнайы сертификаттар табыстады.
Шара соңында халық ардақтысы М.Шоқай есімінің мектеп-гимназияға берілуіне байланысты шығарылған білім ордасының жаңа гимні шырқалды.
Мұхтар БЕРКІНБАЕВ,
мектеп-гимназия мұғалімі.
Нұр-Сұлтан қаласы
>>> Біздің Facebook, Instagram парақшаларымыз бен Telegram каналымызға жазылыңыз! <<<
