Қызылорда өңірінде 9 мемлекеттік қызметші Президент жанындағы Мемлекеттік басқару академиясының грант иегері атанды.
Оның біреуі докторантура, 8-і магистратура бағытына оқуға түсті. Нәтижесінде Сыр елі үздік үш аймақтың қатарына енді. Олар өздері таңдаған мамандықтары бойынша елордада білімін жетілдіреді.
Облыс әкімі грант иегерлерімен кездесіп, оларға сенім білдіріп, алдағы асуларына сәттілік тіледі.
– Заманауи әлемде елдің қуаты, ең алдымен, азаматтардың білімімен өлшенеді. Себебі, білім алу – баға жетпес құндылық. Дәуірлер алмасып, қоғамдық құндылықтар ауысқанымен, үздіксіз білім алуға деген талпыныс өзгермейді. Сіздердің әрбірлеріңіз – Жаңа Қазақстанның білімді әрі бәсекеге қабілетті, мемлекетшіл ұстанымдағы азаматтарсыздар!
Алдағы уақытта білім жетілдіріп, мемлекеттік басқарудың жаңа қырларын игеріп, туған жерге қайта оралып, Сыр елінің жан-жақты дамуы жолында аянбай еңбек етеді деген сенімдемін, – деді Н.Нәлібаев.
Басқосуда грант иегері Альбина Пірниязова келешекте әрбір түлек аймақ дамуына оң әсер беретін жаңа жобаларды дамытып, туған жердің өркендеуіне үлес қосуға әрдайым дайын екенін жеткізді.
Жиын соңында аймақ басшысы мемлекеттік қызметте лайықты еңбек еткен грант иегерлерін арнайы құттықтау хатпен марапаттады.
Облыс әкімінің баспасөз қызметі
>>> Біздің Facebook, Instagram парақшаларымыз бен Telegram каналымызға жазылыңыз! <<<
