Жақында Алматы қаласында «Тайқазан – 2026» кәсіби шеберлік фестивалі өтті. Оған Астана, Алматы, Шымкент қалалары мен Павлодар, Маңғыстау, Қызылорда, Абай, Жетісу облыстары және өзге де өңірлерден 100-ден астам өтініш қабылданды.
Қатысушылар аспаздық шеберлік, тігін және дизайн саласы бойынша сынға түсті. Заманауи стильді ұлттық ерекшелікпен байланыстыру маңызды талаптардың бірі болды.
Қатысушылардың жұмысын Франция, Түркия, Египет, Италия, Ресей, сондай-ақ ТМД елдерінен келген халықаралық сарапшылар бағалады.
Фестиваль студенттердің кәсіби құзыретін дамытуға және заманауи білім беру тәжірибелерін енгізуге оң ықпал етеді. Еліміздің әр өңірінен келген кәсіби аспаздар мен жас мамандар өзара тәжірибе алмасты.
Іс-шараға М.Саламатов атындағы Қызылорда қызмет көрсету және сервис колледжінің өндірістік шебері мен білімгерлері қатысып қайтты. Фестиваль барысында ұлттық тағамдар, көже дайындау, қазан көтеру дәстүрін жаңғырту, ет асу, бауырсақ пісіру көрермен назарына ұсынылды. Сонымен қатар, заманауи аспаздық бағытта тағамды безендіру, сервировка жасау, тағам сапасын бағалау бойынша байқаулар тартысты өтті. Тәжірибелі аспаздар шеберлік сабақтарын өткізіп, тағам дайындаудың жаңа тәсілдері мен технологияларын көрсетті. Жас аспаздар ұлттық тағамдарды заманауи үлгіде ұсыну арқылы шығармашылық қабілетін танытты. Бұл үрдіс ұлттық асхананың жаңа деңгейге көтерілуіне ықпал етті.
Фестивальдің ерекше тұстарының бірі көпшілікке арналған дәм тату алаңының ұйымдастырылуы болды. Мұнда келушілер қазақтың дәстүрлі тағамдарының дайындалу ерекшелігімен танысты.
Сонымен қатар, қолөнер көрмелері мен мәдени бағдарламалар да қатар жүргізіліп, ұлттық құндылықтар кеңінен насихатталды. Аталған іс-шара аспаздық мамандықтың маңыздылығын арттырып қана қоймай, жастардың осы салаға деген қызығушылығын оятты.
«Тайқазан» фестивалі аспаздық өнердің дамуына серпін беріп, ұлттық дәмнің ұлықталуына жаңа бағыт сілтеген маңызды жиынға айналды.
Жанар ЕРНИЯЗОВА,
М.Саламатов атындағы Қызылорда
қызмет көрсету және сервис колледжінің
өндірістік оқыту шебері
