Халықаралық музейлер күніне орай өткен «Музей түні – 2026» атты мәдени-танымдық шарада облыс әкімінің орынбасары Мейрамбек Шермағанбет музей қызметкерлерін мерекемен құттықтап, бірқатарына марапат табыстады.
«Музей – тарих, музей – өмір…» атты кеш барысында мекеме аумағы ұлттық нақыш пен заманауи мәдениетті тоғыстырған үлкен шығармашылық алаңға айналды.
«Дала рухы» этноауылы жасақталып, халқымыздың салт-дәстүрі айшықталса, «Сыр шеберлері» көрме-жәрмеңкесінде қолөнер шеберлерінің бұйымдары көпшілік назарына ұсынылды. «Күй керуені» атты музыка кешінде күмбірлеген күй мен ұлттық әуендер, сондай-ақ, «Балаларға бояулы әлем», «Жұлдыздарға саяхат», «Сұрақтар галереясы» секілді көңілді жобалар мен ұлттық ойындар алаңы келушілерге әдемі әсер сыйлағаны байқалып тұрды.
Музейдің экспозиялық залдарын балаларымен бірге аралаған тұрғындар да ерекше әсерге бөленгені анық. Әсіресе, «Музей түні» аясында жасақталған заманауи фотозона жастардың ерекше қызығушылығын тудырып, суретке түсушілер көп болды.
Мәдени-танымдық кешке зиялы қауым, мәдениет саласының қызметкерлері, суретшілер мен қолөнер шеберлері, БАҚ өкілдері, студенттер, оқушылар және қала тұрғындары мен қонақтары қатысты.
«СБ» ақпарат
