Бүгін футболдан Қазақстан суперкубогы болады, деп хабарлайды ҚазАқпарат тілшісі.
Кездесу 2 наурызда елорда уақытымен 19:30-де «Астана Арена» стадионында өткізіледі. Ойын «Qazsport» телеарнасынан тікелей эфирде көрсетіледі. Бұл жолы аталмыш жүлдені өткен маусымның чемпионы қостанайлық «Тобыл» мен кубок иегері алматылық «Қайрат» сарапқа салады. Суперкубокты классикалық түрде бір ойыннан өткізу туралы шешім қабылданды.
Бұл биылғы наурыз айында ойындар күнтізбесінің тығыздығына байланысты клубтармен келісім бойынша қабылданды. Бүгінгі күнге дейін суперкубокта ел чемпионы мен кубок иегері шеберлік байқасты. Финалда тоғыз команда бақ сынаған.
Олардың арасында «Астана» сегіз мәрте финалда ойнап, бес мәрте (2011, 2015, 2018, 2019, 2020) кубокты иеленді.
Одан кейінгі кезекте Алматының «Қайраты» 5 мәрте финалда бақ сынап, үшеуінде (2016, 2017) жеңімпаз атанды.
Ал «Ақтөбе» 2 (2008, 2010), «Елімай» (1995), «Ордабасы» (2012), «Шахтер» (2013) және «Тобыл» (2021) командалары бір-бірден жеңімпаз тұғырынан көрінді.
Сондай-ақ, «Атырау», «Восток» және «Қайсар» командалары суперкубокқа шыққанымен бірде-бір мәрте оған қол жеткізе алған жоқ. Еске салсақ, биыл ел біріншілігі 5 наурызда жалауын көтереді.
Алғашқы турда 5 наурызда «Каспий» (Ақтау) мен «Қызылжар», «Тұран» (Түркістан) мен «Тараз», «Атырау» мен «Ақсу» (Павлодар облысы), «Астана» (Нұр-Сұлтан) мен «Шахтер» (Қарағанды), «Ордабасы» (Шымкент) мен «Мақтаарал» (Түркістан облысы) командалары кездеседі.
>>> Біздің Facebook, Instagram парақшаларымыз бен Telegram каналымызға жазылыңыз! <<<
