«Бұл сезімді сөзбен жеткізе алмаймын»

352

0

Әнұран естілгенде туған елінің қуатын сезініп, кеудесін қуаныш кернемейтін жан жоқ шығар. Әлемдік аренада екі жағдайда ғана елдің Әнұраны шырқалады: мемлекет басшыларының ресми кездесулері мен спорттық жарыстарда жеңіске жеткен кезде.

Тәуелсіздік алғалы бері ел спортшылары бір тудың астында жарыстарға қатысып, жеңіс тұғырынан көрініп келеді. кеше ғана Ташкент төрінде Қазақстан намысын  қорғаған спортшы Айсамал Сансызбаеваның жа­рыс­тағы жетістіктерінің құр­метіне Ту көтеріліп, Әнұран шыр­қалды.

– Спортта жетістікке жетіп, өзге елде Әнұранды шырқатып, Туды биікке көтеріп, тұғырда бірінші тұру – әр спортшының арманы. Әнұран шырқалғанда көп спортшы көзіне жас алады. Тұғырда бірінші болып Әнұран шырқалған сәтте жан дүниең тебіреніп, елің мен жеріңе деген сүйіспеншілігің арта түседі. Жеңіске деген құштарлығың ашылып, еткен еңбегіңнің еш кетпегенін түсінесің, дайындық жолында қиналған сәттердің барлығы ұмытылады. Өзге елде жеңіске жетіп, Әнұранды шырқатып, бүгінгі бейбіт күннің батыры болып үлес қосып жүргенімізге қуаныштымын, – дейді спортшы.

Бірер күн бұрын ғана Айсамал Өзбекстанның Ташкент қаласында ауыр атлетикадан 20 жасқа дейінгі жастар арасында өткен Әлем чемпионатында алтын медаль жеңіп алып, Әнұранымызды тағы бір асқақтатты. Ол қоссайыс қоры­тындысы бойынша 258 келіні бағындырып, 87 келіден жоғары салмақ дәрежесінде жеңіс тұғырына көтерілді.

– Туымыз желбіреп, Ән­ұранымыз шырқалатын жеңіс тұғырында тұрған кезде ғана бастан кешетін сезімді сөзбен жеткізу өте қиын. Өткен жылы Ташкентте болған Азия чемпионатында 2 мəрте алтын медаль алып, Перудің Лима қаласында жасөспірімдер арасындағы Әлем кубогының жеңімпазы атандым. Осылайша, шетелдік алғашқы жарыс­тарымның өзінде жеңімпаз болып, елімнің Әнұраны шыр­қалды. Абыройдың асқақтап жатқанын, еліміздің бүкіл әлемге танылып жатқанын сезінесің. Тұғырда тұрған сәтте бойыңдағы күш-жігер, намыс оянады. Сол жарысымда өте қуанышты сезімде болдым, өйткені ең алғашқы қадамым алтынмен басталып, Аллаға шүкір, ал­тынмен жалғасуда. Барша қазақ­стандықтарды шын жүректен Рәміздер күнімен құттықтаймын. Әрқашан елі­міздің абыройы асқақтап, көк Туымыз желбірей берсін деген тілектеміз, – дейді ол.

Айсамал Сансызбаева Шиелі ауданының тумасы, қазір Жалаңтөс баһадүр атындағы олимпиадалық резервтің облыс­тық мамандандырылған мектеп-интернатында оқиды. Жас спортшы осымен үшінші рет байрақты бәсекелерде жеңіске жетіп, Әнұранымызды әуелетті.

Биболат СӘТЖАН,

«Сыр бойы»

Пікірлер жоқ. Бірінші болыңыз!

Пікір жазыңыз