Қазалы ауданындағы Қ.Пірімов ауылының жастары мүмкіндігі шектеулі ауылдастарына үй салып берді. Баспананы тұрғызып қана қоймай, оның ішін қажетті жабдықтармен де қамтамасыз етті.
Ауыл тұрғыны, ІІ топ мүгедегі Орысбай Науханбаевтың ауласын жыл сайын су басып қалатын. Биылғы көктемде жауған жаңбыр суы үй ішіне дейін жайылып, баспана жарамсыз күйге түскен. Бұл жағдайға ауыл азаматтары бейжай қарамай, бір жағадан бас, бір жеңнен қол шығарып, жаңа үйдің іргетасын қалауды бастап кеткен еді.
– Өткен жылы Орысбай ағамызға үй салу туралы шешім қабылдағанбыз. Оған қайырымды жандар көмек қолын созды. Небәрі 3 күннің ішінде қомақты қаражат жиналды. Қайырымдылық шарасына ауылдың үлкен-кішісі де, сырттағы ағайындар да атсалысты. Үйдің іргетасын құюдан бастап, кірпішін қалау, шатырын жабу, сыртын сылап-әрлеу жұмыстарына дейін ауылдың жігіттері атқарды, – дейді №92 мектептің мұғалімі Сәбит Ықыласов.
Игі істің арқасында О.Науханбаевтың отбасы жақында жылы да жайлы, заманауи құрылыс материалдарымен салынған үйге көшті.
– Мен туғаннан ІІ топ мүгедегімін. Жарым да – мүмкіндігі шектеулі жан. Өзіміздің үй салуға шамамыз келмеді. Жыл сайын ауламызды су басып, үйіміздің қабырғалары сөгілетін. «Әрі қарай не болар екен?» деп ойланып жүргенде, ауыл азаматтары демеу болды. Оларға алғысым шексіз, – деді ол.
Мұнан бөлек, Қ.Пірімов ауылының азаматтары тағы бір отбасына көмек қолын созуда. Мүмкіндігі шектеулі Бектілеу Ізтілеуовтың үйіне күрделі жөндеу жұмыстарын жүргізуде. Қайырымды жандар үйдің еденін, терезесін және шатырын толық ауыстырып, ішкі-сыртқы сылақтарын түсіріп, қайтадан сылады.
Қиындыққа тап болған отбасыларға жақсылық жасап, жанашырлық танытқан ауыл азаматтарының ісі – көпке үлгі.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
