Арал теңізінің тартылған бөлігі әлі де күрделі мәселе болып отыр. Бұл жөнінде ҚР Экология және табиғи ресурстар министрі Ерлан Нысанбаев Өңірлік экологиялық саммитте мәлімдеді.
Оның сөзінше, бұл аймақ әрдайым жіті қадағаланады.
— Арал теңізінің жалпы 6 млн гектар аумағы құрғап қалған. Оның 2,8 млн гектары Қазақстан аумағында. Тартылған айдынның орнына 2021 жылдан бері өсімдік егіліп келеді. Бүгінде 1,1 млн гектар жерге сексеуіл т. б. тұзға төзімді т. б. ағаш түрлері отырғызылған. Бұл ұлттық жоба ғана емес, трансшекаралық құмды дауылдарға тосқауыл болады әрі аймақтағы экологиялық жағдайға оң әсер етеді. Сол арқылы көрші елдердің де өмір сапасын жақсартады, — деді министр.
Айта кетейік, бұған дейін жердің тозуы мен шөлейттенуге қарсы Қазақстан қалай күресіп жатқанын жазғанбыз.
