Нақты кезеңде «Қызылорда» және «Әйтек» су тораптарында қайта жаңғырту жұмыстары жүргізілуде. Бұған қоса, облыс аумағында Сырдария өзені арқылы 6 тасқын және қашыртқы суды жинайтын жобаларды іске асыру жоспарланып отыр.
Бұл су ресурстарын неғұрлым ұтымды пайдалануға мүмкіндік береді және вегетациялық кезеңде оның тапшылығының алдын алады.
Осы жайында өңірлік коммуникациялар қызметінде өткен брифингте облыстық табиғи ресурстар және табиғат пайдалануды реттеу басқармасы басшысының орынбасары Бауыржан Оспанов айтты.
– Соның ішінде, Қараөзек арнасындағы 3 тоспаны (Байгелді, Картонкомбинат, Қожатай) қалпына келтіру жобасының құжаттамалары биыл мемлекеттік сараптамадан өткен соң Экология, геология және табиғи ресурстар министрлігімен бірлесіп, оны бастау бойынша жұмыстар атқарылатын болады.
Бүгінде Арал ауданындағы «Қамыстыбас-Ақшатау» көлдер жүйесінде күрделі жағдай қалыптасып отырғаны мәлім. Кейінгі жылдары Сырдария өзенінде су деңгейінің төмен болуына байланысты Қамбаш көлі жағадан 200-300 метр алыстап кеткен. Кей тұстары 500 метрге жеткен. Экология, геология және табиғи ресурстар министрі М.Мырзағалиевтің облысқа жұмыс сапары кезінде «Қамыстыбас-Ақшатау» көлдер жүйесін суландыру үшін Аманөткел ауылының тұсында су торабын республикалық бюджет есебінен салу мәселесі келісілді. Жобаның техникалық-экономикалық негіздемесін әзірлеуге 13,8 млн теңге қаржы бөлінді, – деді Б.Оспанов.
Айта кететін жайт, аймақтың су тапшылығы жағдайында елді мекендерді суармалы сумен қамтамасыз етуге және экологиялық жағдайды жақсартуға бағытталған бірінші кезектегі жобаларды іске асыру үшін министрлік пен облыс әкімдігі арасында Жол картасының жобасы әзірленгені белгілі. Ол бойынша жалпы құны 47 млрд теңгені құрайтын 17 жобаны іске асыру көзделіп отыр. Негізгі басымдық қосымша су көздерін ұлғайту, суды қайталама пайдалану және экологияны сауықтыруға арналған жобаларға берілді.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<