Нормалар Құрылтайда қаралады
Елімізде балалардың онлайн платформаларды пайдалануын реттейтін нормалар пысықталып жатыр. Заң жобасы депутаттардың қарауына Құрылтайдың жаңа сессиясы басталғанда шығарылады. Бұл туралы Мәдениет және ақпарат вице-министрі Евгений Кочетов мәлім етті, деп хабарлады Kazinform.
– Онда 16 жасқа дейінгі балаларға тіркеуден өтуге шектеу болады деген норма бар. Жаңа тетіктерді әдейі заңға енгізіп жатырмыз. Бұл қадамдар қазір мемлекеттік органдармен бірге талқылануда. Бұл құжат әлі Парламентке енгізілген жоқ, – деді Е.Кочетов Парламент палаталарының бірлескен отырысынан кейін тілшілер сұрағына жауап бере отырып.
Кочетовтің айтуынша, кейінгі жылдары Еуропаның көптеген елінде балалардың әлеуметтік желілерді пайдалануына тыйым салатын заңнамалық өзгерістер пысықталды. Мұндай шектеулер Австралияда да күшіне енді.
– Жаңа нормалар Үкімет қарауында. Енді осы нормаларды Құрылтай алаңында талқылаймыз, – деді Кочетов.
ҰЛТТЫҚ БАНК ШЕКТІ ДЕҢГЕЙ ЕНГІЗБЕК
Қазақстанда қарыз алушылардың борыштық жүктемесіне бақылау күшейтілмек. Ұлттық банк 2027 жылдың 1 қаңтарынан бастап қарыз алушының кірісіне қатысты борыш коэффициентінің (КБК) шекті деңгейін енгізуді жоспарлап отыр, деп хабарлайды Egemen.kz.
Бұл өзгерістер Ұлттық банк әзірлеген макропруденциялық нормативтер мен лимиттер туралы қаулы жобасы аясында қарастырылған.
КБК көрсеткіші 2024 жылдың тамыз айынан бастап мониторингтік режимде қолданылып келеді. Ол азаматтың барлық өтелмеген несиелері мен микрокредиттері, сондай-ақ жаңа қарызды қосқандағы жалпы берешегінің оның жылдық табысына қатынасын көрсетеді.
Ұлттық банк КБК-ның шекті деңгейін қарыз алушының жылдық табысының 8 есесі көлемінде белгілеуді ұсынып отыр, яғни азаматтың жалпы қарызы оның бір жылдық кірісінен сегіз есе көп болмауы тиіс.
Реттеуші органның мәліметінше, бұл шара банктердің жауапты несие саясатын күшейтуге, халықтың шамадан тыс қарызға бату тәуекелін азайтуға және қаржы жүйесінің тұрақтылығын қамтамасыз етуге бағытталған.
ШЕКТЕУ АЛЫНДЫ
Санитариялық-эпидемиологиялық бақылау комитеті «Orda Trade Astana» ЖШС-ның бірқатар шай өнімін әкелу мен өткізуге қойылған шектеулердің күшін жойды.
Ведомствоның баспасөз қызметінің мәліметіне сәйкес, аталған шешім өнімнің өндірісі мен сатылымының барлық кезеңі бақылауда болғанын растайтын құжаттар мен санитариялық-эпидемиологиялық сараптама нәтижелері негізінде қабылданды.
Өнімдер тізбесінде «Апамның шәйі Premium gold», «Орда Кения», «Аль-Кайрат шәйі Premium gold» бар.
Дайындаған
Айнұр БАТТАЛОВА,
«Сыр бойы»
