Өңірде коронавирус инфекциясының эпидемиологиялық ахуалы күрделеніп барады. Мамандардың айтуынша, оған басты себеп – азаматтардың сақтық шараларына салғырт қарап, санитариялық-эпидемиологиялық талаптарды орындамауы.
Мәселен, кешегі мәлімет бойынша өңірде 125 адам коронавирус инфекциясын жұқтырған. Қазір облыс еліміздегі эпидемиологиялық ахуалды бағалау матрицасында «сары» аймаққа енді. Жаңа жылдың алғашқы он күнінде 200 тұрғыннан індет анықталған. Мамандардың айтуынша, бұл өткен желтоқсан айындағы барлық тіркелген деректен 28 процентке жоғары. Тәуліктік көрсеткіш те жылдам көтерілуде.
Жалпы 2020 жылдың наурыз айынан бері облыста коронавирус жұқтырған 19759 науқас тіркеліп, олардың 18969-ы жазылып шыққан.
– Аймақта жұқпалылығы жоғары «омикрон» штамының болуы ықтимал деген болжам бар. Өңірде құрылған 167 мониторингтік топ тұрғындардың және кәсіпкерлік нысандарда карантин талаптарының сақталуын тұрақты бақылауда. Әлемдегі коронавирус инфекциясының күрделі ахуалын ескере отырып, азаматтарды карантин талаптарын жауапкершілікпен орындауға, вирусқа қарсы вакциналауға шақырамыз, – дейді облыстық санитариялық-эпидемиологиялық бақылау департаменті мамандары.
Ал 12 қаңтардағы жағдай бойынша өңірлердегі эпидемиологиялық ахуалды бағалау матрицасында «қызыл» аймақта Нұр-Сұлтан, Алматы, Шымкент қалалары, Атырау облысы тұрса, «сары» аймақта Қызылордадан бөлек Ақтөбе, Батыс Қазақстан, Павлодар, Қарағанды, Маңғыстау облыстары бар. Ақмола, Алматы, Түркістан, Жамбыл, Қостанай, Солтүстік және Шығыс Қазақстан облыстары «жасыл» аймақта. 12 қаңтарда елде коронавирус инфекциясын жұқтырған 4810 жағдай тіркелді. Осылайша індет жұқтырғандар саны 1004464 адамға жетті.
Денсаулық сақтау министрі Ажар Ғиният Үкімет отырысында елде «Омикрон» штамының анықталуына байланысты эпидемиологиялық жағдайға болжам жасады.
– Оптимистік сценарий кезінде, ревакциналаумен 100 процент қамтып, алдын алу шараларын жаппай сақтағанда тәулігіне 17 мыңнан аса жағдай тіркеледі. Реалистік сценарийге сәйкес, ревакциналаумен 70 процент қамтылған жағдайда тәулігіне 25,5 мың науқас тіркелуі мүмкін. Пессимистік сценарий бойынша, алдын алу шарасын сақтамай, ревакциналаумен 40 процент қамтылғанда тәулігіне 40 мың жағдай тіркелуі мүмкін, – деді ол.
Мамандардың айтуынша, ауруды ауыздықтаудың жалғыз жолы – вакциналау. Аймақ вакциналау көрсеткіші бойынша республикада алғашқы бестікте. Қазіргі кезде облыс тұрғындарының 92,4 проценті екпенің бірінші компонентін алса, 86,2 проценті толық курсынан өткен. Өңірде тұрғындарды иммундауға арналған вакцина қоры жеткілікті.
Облыстық санитариялық-эпидемиологиялық бақылау департаменті мамандары әлемдегі, елдегі күрделі эпидемиологиялық ахуалды ескере отырып, азаматтарды карантин талаптарын жауапкершілікпен орындауға, індетке қарсы екпе алуға шақырады.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
