Кеше облыс әкімі Гүлшара Әбдіқалықованың жетекшілігімен жергілікті диқандардың көктемгі дала жұмысына дайындығы пысықталды. Су мәселесінің жыл өткен сайын күрделенуі күріштік көлемін біртіндеп кемітуге әкеп тіреп отыр.
Қазіргідей уақытта ақмаржанды мал азығы түріндегі дақылдармен, көкөніспен алмастырған орынды. Өйткені жылда қайталанатын су тапшылығы әлі де қос бүйірден қысып тұр. Облыстық ауыл шаруашылығы басқармасының басшысы Шахмардан Қойшыбаевтың айтуынша, биыл 188,2 мың гектар жерге тұқым себіледі. Оның 84,4 мың гектары – күріш.
– Егісті әртараптандыруға, суды үнемдеуге бағытталған жобаларға басымдық беріледі. Соңғы жылдары қызанақ, жоңышқа, бидай, көкөніс егуге көбірек көңіл бөлініп келеді, – деді ол.
Әсіресе, егінді жаңбырлатып, тамшылатып суаруға, аквагель көмегімен өнім өндіруге ерекше назар аударыла бастады. Мысалы, шаруашылықтар Жаңақорған ауданында 3 мың гектар жерге тамшылатып суару арқылы қызанақ, Шиелі ауданында 10 мың гектар алқапқа жаңбырлатып суару әдісімен жоңышқа егіп, оң нәтижеге қол жеткізгені белгілі.
Арал-Сырдария бассейндік инспекциясының басшысы Сейілбек Нұрымбетовтің сөзінше, қазіргі күні Сырдария өзені бассейнінің үлкен су қоймаларындағы су мөлшері 13,7 млрд текше метрге жуық. Яғни өткен жылмен салыстырғанда 3,1 млрд текше метрге кем.
– «Шардара» су қоймасында – 4792 млн, «Көксарай» су реттегішінде 1404 млн текше метр су бар. Бұл да аз. «Көкбұлақ» су бекетіне секундына орта есеппен 581 текше метр су түсіп жатыр, – деді инспекция басшысы.
Өзбекстан мен Қырғызстан синоптиктерінің болжамы да көңіл көншітпейді. 2020 жылдың 1 қазаны мен 2021 жылдың 1 наурызы аралығындағы жауын-шашын көрсеткіші былтырғыдан шамамен 15-20 процентке төмен. Соған қарағанда биылғы вегетациялық кезеңдегі жағдай аса қуанта қоймайтын секілді.
Аймақ басшысы су жетіспеушілігіне байланысты егін алқабының мақсатты пайдаланылуына ғарыштық мониторинг арқылы бақылау жүргізілетінін жеткізді. Сондықтан күрішті артығымен егуге жол жоқ.
Мемлекет басшысының орман қорында – 2 млрд, елді мекендерде 15 млн ағаш отырғызу жөніндегі тапсырмасына сәйкес 21 наурызда «Мекенім – жасыл орманым», «Бұл – менің ағашым» акциялары, «Таза табиғат» жобасы жүзеге асырыла бастайды. Облыстық табиғи ресурстар және табиғат пайдалануды реттеу басқармасының басшысы Бауыржан Шәменов игі шаралар өңірдің экологиялық жағдайын жақсартуға, көркейіп-көгалдануына көмектесетінін атап өтті.
Облыс әкімі тазалық шараларына ұйымшылдықпен қатысу туған жердің табиғатына бейжай қарамайтын әрбір азаматтың парызы екенін айтты.
Назерке САНИЯЗОВА,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
