Ұлттық қауіпсіздік қызметінің запастағы подполковнигі Ғани Сихымовтың «Наш тренер» атты деректі-ғұмырнамалық кітабының тұсауы кесіліп, оқырманға жол тартты.
Жаңа туындыда Қазақстанның еңбек сіңірген жаттықтырушысы, «Парасат», «Құрмет» ордендерінің иегері Вилорий Викторович Пактың өнегелі өмірі мен қажырлы еңбегі баяндалған. Деректі хикаятта спорт саңлағының ғұмырбаяны ғана емес, үлкен спорттағы ірі жеңістер мен сәтті оқиғалар туралы айтылып, жаттықтырушының жанкешті еңбегі шынайы патриотизм үлгісі деп бағаланады. Сондықтан бұл кітіп тек спорт саласына қызығушылар емес, жалпы оқырман үшін де тартымды екені сөзсіз.
Атап айтқанда, жаңа туындыға Олимпиада ойындарының, Әлем және Азия чемпионаттарының жеңімпаздарын баптап шығарып, отандық спорттың дамуына өлшеусіз үлес қосқан Вилорий Пактың тұлғалық болмысы бірегей архивтік деректер мен шәкірттерінің шынайы жазбалары және жеңісті сәттердің сипаттамалары арқау болған.
– Бұл кітап – өз ісіне адал, Отан намысын бәрінен биік қойған ұлы ұстазға деген құрмет. Вилорий Пактың өмір жолы – бүгінгі жас буын мен болашақ чемпиондар үшін ерекше үлгі әрі сарқылмас жігер, – дейді кітап авторы Ғани Сихымов. Сондай-ақ ол кітаптың жарыққа шығуына қолдау көрсеткен Қазақстандағы корейлер ассоциациясына және спорт саласының ардагері Ю.Цхайға алғысын білдірді.
Айта кетейік, Қазақстанның еңбек сіңірген жаттықтырушысы Вилорий Пак – ауыр атлетикадан төрт дүркін Әлем чемпионы Илья Ильин, Азия чемпионы Олег Шин, Азия чемпионатының екі мәрте жеңімпазы Роман Русиновский, Әлем чемпионатының қола жүлдегері Қуаныш Рахатов сияқты ел намысын қорғаған спорт саңлақтарының ұстазы. Жалпы 60 спорт шебері, 12 халықаралық спорт шебері және 1 Еңбек сіңірген спорт шеберін дайындаған.
Мәдени-танымдық мәні зор іс-шараға спорт саласының дамуына өлшеусіз үлес қосқан құрметті ардагерлер, Юрий Ким, Абылай Жалдыбаев, Николай Некрасов, Садық Мұстафаев және халықаралық ареналарда жеңіс тұғырынан көрініп, мемлекеттік туды көтерген Олимпиада чемпиондары қатысты.
Кітап кейіпкері, Қазақстанның еңбек сіңірген жаттықтырушысы Вилорий Пак сөз алып, автор мен келген қонақтарға алғыс білдіріп, жүрекжарды жылы лебізін жолдады.
«Жаңа туынды отандық спорт тарихы мен өскелең ұрпақ тәрбиесіне қосылған құнды қазына» деп баға берді жиынға қатысушылар.
Ғазиза ӘБІЛДА,
«Сыр бойы»
