Облыс әкімі Нұрлыбек Нәлібаев «Қазатомөнеркәсіп» Ұлттық атом компаниясы» акционерлік қоғамының басқарма төрағасы Мейіржан Юсуповпен кездесті. Басқосуда ұлттық компанияның демеушілігімен 3 млрд 800 млн теңгеге салынатын жаңа «Достық үйінің» құрылысы талқыланды.
– Биыл – этносаралық түсіністіктің үлгісін әлемге танытқан Қазақстан халқы Ассамблеясының 30 жылдығы. Осы мерейлі жылда жаңадан салынатын «Достық үйі» – өңір халқының бірлігі мен ынтымағын нығайтуға атсалысқан этномәдени бірлестіктерге арналған, барлық қажеттіліктермен қамтамасыз етілген заманауи ғимарат болады. Сізге және компания ұжымына Сыр жұртшылығының атынан шынайы алғысымызды білдіреміз, – деді облыс әкімі.
Кездесуде Мейіржан Юсупов екіжақты әріптестіктің алдағы уақытта да нығая түсетініне сенім білдіріп, жоспарларын бөлісті.
Айта кетейік, «Қазатомөнеркәсіп» компаниясының қажетті жабдықтарды сатып алу жүйесіне жыл сайын шамамен 3 мыңға жуық кәсіпкер қатысады. Соның ішінде қызылордалықтар үлесі – 7%, яғни шамамен 200 кәсіпкер. Облыста 65 мыңға жуық кәсіпкер жұмыс істейді, оның 4500-ге жуығының жұмысы өндіріске бағытталған.
