Облыс әкімі Гүлшара Әбдіқалықова Наурыз мейрамы қарсаңында Тұңғыш Президент атындағы саябақта өткен ағаш отырғызу рәсіміне қатысты. Іс-шара «Таза табиғат» акциясы аясында ұйымдастырылды.
ҚР Президенті Қасым-Жомарт Тоқаев өз Жолдауында елімізді ауқымды көлемде көгалдандыруды және экологиялық жағдайды жақсартуды тапсырған болатын. Мемлекет басшысының тапсырмасы аясында республика көлемінде «Таза табиғат» экологиялық акциясы ұйымдастырылуда.
– Бабаларымыз әз Наурыз келгенде бұлақтың көзін ашып, ағаш отырғызуды дәстүрге айналдырған. Бұл – ежелден келе жатқан біздің ата-салтымыз әрі бүгінгі жастарға көрсетер тәрбиелік мәні зор үлгі-өнегеміз. Туған жерді және оның табиғатын қадірлеу – азаматтық парызымыз десек, ауламызға тал егіп, туып-өскен аймағымызды көгалдандыру өмір салтына әрі күнделікті дағдымызға айналуы тиіс деп білемін. Сыр халқын осы игілікті іске белсене араласуға шақырамын, – деді облыс әкімі.
Іс-шарада қоғам қайраткері Сәпен Аңсат көпшілікті облыс ардагерлері атынан Наурыз мейрамымен құттықтап, жиналған қауымға батасын берді.
Айта кетейік, «Таза табиғат» акциясына 6 мыңнан астам тұрғын қатысып, жергілікті жерде өсетін 20 мыңнан астам Сыр талы, қарағаш және жеміс ағаштарының көшеттерін отырғызуда. Мемлекеттік қызметкерлер де акцияға үлес қосып, Тұңғыш Президент саябағында 300-ге жуық ағаш екті.
Елімізде жасыл желекті көбейту мақсатында өткен жылы Экология, геология және табиғи ресурстар министрлігі жергілікті әкімдіктермен бірлесіп арнайы алгоритм әзірлеген болатын. Осы құжат негізінде алдағы 5 жылда өңіріміздің табиғатына төзімді 178 миллион тал отырғызу жоспарлануда. Бұдан басқа, Арал теңізінің құрғаған табанына жыл аяғына дейін 1 миллион 800 мыңнан астам сексеуіл егіледі.
Сонымен қатар облыс әкімі «Қызылорда» су торабына барып, қайта жаңғырту жұмыстарымен танысты. Бас мердігер «CaspianContrctorsTrust» ЖШС жетекшісі Қайрат Ибраев атқарылып жатқан жұмыстар барысын баяндады.
Жоба құны – 2 млрд 600 млн теңге. Қайта жаңғырту жұмыстары 2020 жылдың қазан айында басталып, 2022 жылдың аяғында бітеді деп жоспарлануда. Қазір мұнда 70-ке жуық қызылордалық жұмыс істейді, 15 техника жұмылдырылған. Жөндеуде қолданылып жатқан құрылыс материалдарының 90%-і – отандық өнім.
Аймақ басшысы жұмыстар сапасына баса мән беруді, жұмысшылардың жалақысын уақытылы төлеуді және жоспарланған мерзімде бітіруді тапсырды.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
