Жесірін қаңғыртпаған, жетімін жылатпаған қазақылықтың кейінгі ұрпақ бойына көшпеуі мүмкін емес. Мұның мысалын өмірдің өзі дәлелдеп келеді.
Осыдан біршама уақыт бұрын газетімізде бес балалы отбасына өз есебінен 3 бөлмелі пәтер берген қызылордалық құрылысшы кәсіпкер Темірхан Әлімқұлов жайында жазған едік.
Әдетте бұл кісілер аты-жөнін атауды жөн санамайды. «Оң қолыңның бергенін сол қолың көрмесін» деген қазақтың тамаша қағидасын ұстанады. Алайда, «берген қол алған қолдан қайырлы» дегендей, дінімізде «жария садақа» деген де тәмсіл бар. Бұл жайында Құранда «Егер садақаларыңды ашық түрде берсеңдер жақсы. Ал, егер жасырсаңдар әрі оны кедейлерге берсеңдер, өздерің үшін қайырлы. Ол сендердің жаман істеріңді өшіреді» делінген.
Біздің айтпақ болып отырғанымыз осы төңіректегі әңгіме, ол – мынау.
Жақында «Фейсбук» желісінде Астанада өрттен қаза болған 5 сәбидің қазасына көңіл айтып, сосын «хабарласқан көпбалалы ана болса, оған өз есебімнен пәтер әперуге дайынмын» деген мазмұнда жасы отыздың шамасындағы жас кәсіпкердің бейнетаспасы жарияланған болатын. Бірақ, хабарласушылардың қай жерге өтініш беруі керектігін білдірсе де кәсіпкер аты-жөнін атамаған еді.
Бейнетаспа әлеуметтік желідегі «Жаға ұстатты» тобында жарияланғандықтан мен топ жетекшісі Динара Смайловамен байланыстым. Астаналық бауырымыздың аты-жөні Жандарбек Садықов болып шықты. «Кэш» ломбард дүкенінің қожайыны екен.
Жуырда Динара тағы бір жақсы жаңалықты жария етті. Жандарбек Ақмола облысы Целиноград ауданы Қосшы ауылының тұрғыны, көп балалы ана Қарабаеваға үй сатып алып беріпті.
Біз сөзін жерге тастамаған, уәдесін желге ұшырмаған жас кәсіпкерді талайға үлгі боларлық ісімен жанымызға жақын тұтып отырмыз. «Елім» дейтін ерлеріміз осындай азаматтар ғой. Бәрекелді!
Дүйсенбек АЯШҰЛЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
