Филармония ұжымының ұйымдастыруымен Н.Бекежанов атындағы облыстық қазақ музыкалық драма театрында мәдениет саласының майталманы, дирижёр Кеулімжай Ботабаевтың 60 жасқа толған мерейтойына арналған шығармашылық кеш өтті.Қазанғап атындағы Қызылорда музыкалық училищесінің директоры, Тұрмағамбет атындағы ұлт аспаптар оркестрінің дирижёрі әрі көркемдік жетекшісі, дарынды өнер иесі Кеулімжай Ботабаевтың мерейтойына арналған шығармашылық кеште облыстық мәдениет, архивтер және құжаттама басқармасының басшысы Мира Әбуова сөз сөйлеп, тілектестігін жеткізді. Сырдың талантты перзентіне облыстың «Құрмет грамотасын» табысталды.
Қазақстанның еңбек сіңірген қайраткері, ҚР Мемлекеттік академиялық симфониялық оркестрдің және Н.Тілендиев атындағы академиялық фольклорлық-этнографиялық «Отырар сазы» халық аспаптар оркестрінің дирижёрі Мүсілім Әмзе, «Құрмет орденінің» иегері, Ғ.Құрманғалиев атындағы Батыс Қазақстан облыстық филармониясының Дәулеткерей атындағы оркестрдің бас дирижёрі, мемлекеттік «Дарын» жастар сыйлығының лауреаты Еркін Нұрымбетов, халықаралық пианистер конкурсының дипломанты Жания Ботабаева кешке қонақ ретінде қатысып, мерейтой иесіне ізгі тілектерін жеткізді.
Сондай-ақ, халықаралық, республикалық байқаулардың лауреаттары Мақсат Мақұлбеков, Сымбат Тасбергенова және Қазанғап атындағы Қызылорда музыкалық колледжінің өнерлі студенттері концерттік бағдарлама ұсынды. Бұған қоса, солист М.Мақұлбеков А.Лараның «Гранада» шығармасын орындап, Тұрмағамбет атындағы халық аспаптар оркестрі сүйемелдеді.
Концертте Л.Боккерини, Г.Форе, К.Сен-Санс, П.Чайковский, А.Лара, Ш.Гуно сынды шетел композиторларының туындыларымен қатар, Құрманғазының, А.Жұбанов пен Е.Брусиловскийдің шығармалары және халық әндері орындалды. Бірқатар күрделі шығармаларға мерейтой иесі К.Ботабаевтың өзі дирижёрлық етті. Мәселен, К.Ботабаевтың дирижёрлығымен орындалған А.Жұбановтың «Романс», Л.Боккерини «Рондо», Г.Форе «Пробуждение» және К.Сен-Санс «Аллегро аппассионато» сынды шығармаларды көрермен қауым ыстық ықыласпен тыңдады.
Камералық оркестр орындаған П.Чайковскийдің «Ноктюрн» шығармасына Мүсілім Әмзе дирижёрлік етсе, виолончелистер ансамблі (дирижёрі Е.Нұрымбетов) А.Арутюнянның «Экспромт» шығармасын ұсынды.
Осылайша, Сыр халқы рухани мерекенің қуанышына ортақтасты.
Айта кетейік, Сыр елінен Мемлекеттік сыйлықтың иегері Төлепберген Әбдірәшев, бүкіл өмірін оркестрге арнаған Қарасай Сайжанов секілді тамаша дирижёрлер шыққан. Белгілі музыка мамандары осы қатарға Кеулімжай Ботабаевты да қосады. Талантты жерлесіміз осы саладағы еңбегі үшін «Мәдениет қайраткері» төсбелгісімен, «Құрмет» орденімен марапатталған.
Сара АДАЙБАЕВА,
«Сыр бойы».
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
