Таяуда Ә.Тәжібаев атындағы облыстық әмбебап ғылыми кітапханасында қазақ әдебиетінің даму жолында айрықша ізі бар, бағасы биік басылым «Жұлдыз» журналының 90 жылдығына орай танымдық шара өткізілді.
Сонау 1922 жылы «Шолпан», 1924 жылы «Таң» деген атаумен танылған әдеби көркем журналдардың ізімен 1928 жылы алғашқы саны жарыққа шыққан бұл журнал, сол кезеңдердің басты тақырыбын арқау етіп, 1928-1932 жылдары «Жаңа әдебиет», «Жыл құсы», «Әдебиет майданы», 1941-1945 жылдары «Майдан», 1945-1957 жылдары «Әдебиет және искусство», ал 1957 жылдан күні бүгінге дейін «Жұлдыз» деген атаумен таралып келеді.
Журналдың қалыптасуына Б.Майлин, І.Жансүгіров, М.Әуезов, С.Мұқанов сынды қазақ әдебиетінің классиктері көп еңбек сіңірді. Ал журналдың алғашқы редакторы Алаштың көрнекті қайраткері, ақын С.Сейфуллин болса, одан бері Ғ.Мүсірепов, З.Қабдолов, Ә.Нұрпейісов, С.Мәуленов, Ш.Мұртаза, М.Мағауин сияқты қазақ әдебиетінің тұғыры биік тұлғалары басқарған.
Ғасырға таяу ғұмыр жасаған «Жұлдыз» журналы күні бүгінге дейін әдебиет көшіне ілескен талай таланттардың жұлдызын жағып, қалың оқырманға танылуына қолдау көрсетіп келеді. Сонымен бірге, әдебиет, мәдениет, жалпы руханият айналасындағы өзекті тақырыптарды көтеріп, қоғамда шынайы шығармашыл ортаның қалыптасуына көп еңбек сіңірді. Айталық, журналдың «Проза», «Поэзия», «Ислам тағылымы», «Әдеби мұра», «Зерде» деп аталатын бөлімдерінде қазақ ақын-жазушыларының жаңа шығармалары, өнер туындылары, халқымыздың тарихы мен мәдениетіне қатысты танымдық дүниелер тұрақты жарияланып отырады.
Кітапханадағы шарада «Жұлдыз» журналының кешегісі мен бүгіні, қазақ әдебиетінің қалыптасуындағы рөлі жайында қаламгерлер мен қарапайым оқырмандар тарапынан кең көлемді ой-пікірлер ортаға салынып, жалпы шығармашылық саласындағы жаңалықтар жайлы әңгіме өрбіді. Бұл орайда ҚМУ-дың профессоры, Қ.Мұхамеджанов кітапханасының ғылыми кеңесшісі Қазыбай Құдайбергенов журналға М.Мағауин редакторлық еткен уақыттары әр санын қалт жібермей оқығанын айтып, әр дәуірдің әдебиетіндегі өзіндік өрнек пен өзгешелік жайында өз ойын білдірді. Ал Қазақстан Жазушылар одағының мүшесі, ақын Толыбай Абылаев сонау 1982-1983 жылдары «Жұлдыз» журналының бетінде алғашқы өлеңдері жарияланып, ауыл арасына енді таныла бастаған шағында шабытын шыңдап, шығармашылығына қолдау болғанын ерекше тебіреніспен еске алды. Сондай-ақ, сол кезеңдерде таралымы 300 мыңға жуықтаған журнал қарапайым балықшының қайығында, жүргізушінің көлігінде жүретін көркем дүниеге айналғаны – бағыты бөлек басылымның айқын бет-бейнесі екенін айтты. Ақын өз ойын журналдың соңғы санында шыққан өлеңімен түйіндеді.
Шараға қатысқан кітапхананың тұрақты оқырмандары А.Сайлаубаев, К.Сейітов, И.Әбдікәрімов атындағы агроколледж мұғалімі К.Ілиясова да журналдың тарихына, мазмұнына қатысты түрлі пікірлерін білдірді.
Ғазиза ӘБІЛДА,
«Сыр бойы».
>>> Біздің Facebook, Instagram парақшаларымыз бен Telegram каналымызға жазылыңыз! <<<
