Наурыз мерекесі қарсаңында облыс орталығында жәрмеңке өтіп, қаланы думанға бөледі. Сенбілік саудада, ең бастысы, өнімдер халыққа қолайлы бағада ұсынылды.
Облыстық ауыл шаруашылығы басқармасы ұйымдастырған жәрмеңкеге Қызылорда қаласы мен барлық аудан шаруалары атсалысты. Астана даңғылының бойында, Көшербаев пен Амангелді көшесінің аралығында өткен ауқымды шараға келушілер қатары көп болды.
Жәрмеңкеге жүзге жуық жүк көлігімен 250 тоннадан астам ауыл шаруашылығы өнімі әкелініп, қытымыр қысты өткізіп, көктемге іліккен ел қалағанынша керегін алды. Басқарма басшысы Шахмардан Қойшыбаев: «негізгі мақсатымыз – тауарөндірушілердің өнімін халыққа тікелей ұсыну» – дейді.
Молшылықтың белгісі саналатын бұл шарада 50 тоннадан астам күріш, 40 тоннаға жуық картоп, 15 тоннадай асқабақ, 80 тоннадан астам көкөніс пен жеміс-жидек, 7 тонна шамасында ет, 15 тонна балық және 20 тоннаға жуық жем-шөп сатылды. Осылайша Ұлыстың ұлы күні қарсаңында елдегі тоқшылық пен татулық, көтеріңкі көңіл-күй салтанат құрды.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
