Көтерілген мәселе қараусыз қалмайды

279

0

Кеше облыс әкімі Гүлшара Әбдіқалықова өңірдегі мүгедектігі бар азаматтармен кездесті. Кездесуге тиісті жауапты тұлғалар қатысты деп хабарлайды облыс әкімінің баспасөз қызметі.

2020 жылы өңірімізде мү­гедектігі бар адамдардың құқық­тарын қамтамасыз ету және тұрмыс сапасын жақсарту жөніндегі 2025 жылға дейінгі Жол картасы әзірленіп, бекітілді.

Жол картасы мүгедектігі бар адам­дардың профилактикасы, бі­лім беруге, спорттық, мәдени өмір­ге қолжетімділігі, кедергісіз орта, экономикалық дербестік, сапалы жұмыспен қамту, әлеуметтік оңалту, абилитация тиімділігін арттыру, төтенше жағдайлар ке­зінде мүгедектердің қауіпсіздігін қамтамасыз ету, әлеуметтік қызмет көрсету жүйесін жаңғырту шараларын қамтиды.

Мүгедектігі бар адамдарды қолдау шаралары әрі қарай да жалғасын табатын болады.

Кездесу барысында Қызылорда, Байқоңыр қалалары мен аудандардан келген мүгедектігі бар адамдар тарапынан жеке көмекшінің көрсеткен қызметі үшін 8 сағатқа толық ақы төлеу, санаторий-курорттық емделу кезінде ілесіп жүрушіге жол жүру ақысы мен тұруға қаржы қарастыру, бөлмелік кресло-арбаның қолдану мерзімін қысқарту және т.б. мәселелер көтерілді.

Жалпы, облыста 30 мыңнан астам мүгедектігі бар адам тіркелген. Оларды әлеуметтік қорғауға бөлінген қаржы жыл сайын артып келеді. 2020 жылы бөлінген қаржы өткен жылдармен салыстырғанда 1,5 есеге артып, 1,4 млрд теңгені құрады. Нәтижесінде 15 мыңнан астам жеке оңалту бағдарламалары орындалды.

Мүгедектерге берілетін техникалық оңалту құралдарының тізбесі жылдан-жылға кеңейе түсуде. 2020 жылы 55 түрі болса, биыл енгізілген өзгерістермен оңалту құралдарының түрі 60-қа жеткізілген.

2020 жылдан бастап мүгедектігі бар адамдарға әлеуметтік оңалтудың іс-шараларын оңтайландыруға бағытталған Әлеуметтік қызметтер порталы қолданысқа енгізілді. Өткен жылы әлеуметтік оңалту шаралары ішінара портал арқылы алынса, 2021 жылдан бастап толығымен порталға көшті. 

ҚР Еңбек және халықты әлеу­меттік қорғау министрлігі тарапынан порталдағы техникалық кем­шіліктерді оңтайландыруға ба­ғытталған жұмыстар жүргізілуде.

Кездесуде облыс әкімі жауапты мемлекеттік органдардың басшыларына көтерілген мәселелер бойынша тапсырма беріп, заң­дылыққа сәйкес кезең кезеңімен қарастырылатынын айтты.

Сонымен қатар, облыстық жұмыспен қамту және әлеуметтік бағдарламалар басқармасының басшысы Гаухар  Қалмақоваға белсенді мүмкіндігі шектеулі азаматтардың қатысуымен арнайы жұмысшы топ құрып, көтерілген мәселелер бо­йынша тиісті жұмыстар жүргізуді тапсырды. Нәтижесі бойынша наурыз айының соңына дейін есеп беруді жүктеді.

Пікірлер жоқ. Бірінші болыңыз!

Пікір жазыңыз