Ә.Тәжібаев атындағы облыстық әмбебап-ғылыми кітапханада Жамбыл Жабаевтың туғанына 175 жыл толуына орай кітап көрмесі ашылды. Оған ақынның айтыстар жинағы, ол туралы монографиялар, мақалалар қойылған.
Көрмені ашу рәсіміне филология ғылымдарының кандидаты, профессор Ұлжан Жаңбыршиева қатысып, ақынның өмірі мен шығармашылығының зерттелуі туралы айтты. Қазір М.Әуезов атындағы Әдебиет және өнер институтының директоры, филология ғылымдарының докторы, профессор Кенжехан Матыжанов бастаған бірқатар институт ғалымдарының қолдауымен жамбылтанудың жаңа кезеңі қолға алынып отыр.
– Жамбылды зерттеуші Есмағамбет Смайылов, Мұхтар Әуезов, Ғабит Мүсірепов, Әуелбек Қоңыратбаев, бүгінгі Темірхан Тебегенов сияқты ғалымдар көп. Ел өміріндегі табыс пен жаңғыруды, жеңіс пен ерлік істерді ерекше шабытпен жырлаған ақынның терең зерттеуді қажет ететін шығармалары баршылық. Жамбылдың революцияға дейінгі өмірі де әлі толық зерттелмей келеді, – деді Ұлжан Жаңбыршиева.
Іс-шарада облыстық кітапхана ұйымдастырған эсселер байқауының жеңімпаздары да марапатталды. Үш санат бойынша өткен сайысқа 52 талапкер қатысқан. Байқау қорытындысымен студенттер арасында Қорқыт ата атындағы Қызылорда университетінің студенті Альбина Шакизада, мұғалімдер мен оқырмандар арасында Арал аудандық Абай атындағы кітапхана оқырманы Перизат Елеуліқызы, оқушылар арасында №196 қазақ орта мектебінің оқушысы Назым Әбілбашар жеңімпаз атанды.
Эпидемиологиялық ахуалға байланысты марапаттау рәсімі онлайн өтті. Іс-шара соңында ақын өлеңдері оқылып, жаңа көрме оқырмандарға таныстырылды.
Биболат СӘТЖАН
>>> Біздің Facebook, Instagram парақшаларымыз бен Telegram каналымызға жазылыңыз! <<<